世上係冇穩穩陣陣9厘息嘅，長大啦
今日最震憾嘅新聞，當然係匯豐（5）減派息。由於太突然，所以早早在Facebook Page寫咗，大家可以睇返，呢度唔再重覆呃字數。
（https://bit.ly/2R2thvl）（https://bit.ly/3bEMpr6）
我只係想深入探討多幾個問題。第一，正如FB Page嘅文講，M&M，你派唔派息唔應該影響股價架喎。當然理論還理論，現實還現實，現實股息有稅（特別美股），所以你見好多美國公司寧願舉債，甚至係舉債嚟回購。但總之，匯控唔派息，或者遲派一年，就令個股價跌10%？明顯係跌突。當然亦可以理解為「投資者擔心好大鑊」，而當然唔係叫你去搏反彈，純學術討論。
另一邊，渣打（2888）個情況仲好笑，更加無辜，在英國都冇乜業務，但照樣畀人搞。但即係話遷冊當時又有好多人反對啫。
另外我亦都想研究，純FF，其實英國政府，有冇權要恒生（11）都停埋派息？我理解，應該係有嘅。因為係英國公司HSBC plc嘅子公司嘛。不過可能見你細細地就放過你咁解，同埋理論上恒生只能派自己嘅嘢，不能派埋阿媽—但what if 我派盡然後叫阿媽注資？又甚至，我可唔可以整間HSBC Asia然後搬晒啲嘢入去，呢間嘢香港上市香港註冊，然後HSBC plc渣呢間嘢？咁到時HSBC Asia派息又得唔得？（其實而家「香港上海匯豐銀行」都係類咁玩，不過冇分開上市）。
類似嘅玩法，其實一大堆百幕達呀，開曼呀公司都有啲類似。或者係中移動（941），其實係香港公司。但當然大陸可以阻你派息。講到尾都係誰大誰惡誰正確。我甚至亦懷疑，平保（2318）可唔可以告英國政府，無啦啦收少啲息喎。當然實務上係唔得嘅。
講埋大市，呢個圖係今日各隻股票拉高拉低恒指幾多點。你見匯控一隻，已經拉低恒指200點。撇除呢個因素，恒指今日跌300點左右，唔係太差。
亦都牽一髮動全身，匯控原來息唔穩陣（其實基金一早知，但可能冇估到政府咁粗暴），你見到大家搵其他代替品。望下樓上個圖，左上角。本地地產股（新地（16）新世界（17）），領展（823），煤氣（3）， 中銀（2388）都跑出。明顯市場搵緊一啲visible 嘅收息股。仲有之前有講嘅香港電訊（6823）亦都跑出。
中銀（2388）好似成為受惠股，因為公司仲強調話派息政策冇變。但諗真啲係廢話，所有派息政策變之前都係冇變的（自己嗒真啲），話變咪變。我都相信唔會變住，但無論如何銀行股唔算吸引。
有人問內銀股，其實情況差不多。當然講殘夠晒殘，息又好似派到，人民幣又企得硬。但中國國情下，經濟差當然係直接間接犧牲銀行。真係要買要渣，都只能考慮四大行。你睇隻甘肅銀行（2139）？啲業績幾難睇，今日插一半。呢啲就係冇險可守嘅銀行了。
另外，想防守嘅，記得上期都提過大家樂（341），今日即時有反應。疫情當然未見盡頭，但似乎估值夠晒殘。當然唔好睇嗰6厘息，假象嚟。
最後都係要再提，長實（1113）不經不覺10日新高。李嘉誠父子又再增持，仲使問其他嘢？
提提大家，其實只要有個log in，可以睇返之前嘅文章。我都係剛剛先發現呢樣嘢，都係一路摸索。之後提返之後文章會比較簡單。最好就剪存。因為講真，好多時啲嘢我都會講完又講，亦都記住留意我Facebook Page （http://bit.ly/2RqXfYv）．推介埋畀朋友更好。十分緊要呀。