等香港電視（1137）出數
先講大市，其實星期五寫完見底，美股當晚就插返成千點，都以為自己又做燈神。但香港呢邊今日（星期一）仲係企得幾硬，一度倒升添。似乎最壞嘅時間應該過咗。正路地，香港多數大價股都係中資，而中國「似乎」控制到疫情，又開始全面復工，咁香港繼續企硬都幾合理—事實在呢個跌浪中，A股最掂，香港都不錯。當然平係一個重點，之前一路跑輸都係。但，最大風險當然係到底中國嘅數據有幾可信。齋拗真定假冇意思，肯定有啲假，但又唔係完全假。睇下會唔會二次爆發，如果唔會嘅，似乎港股都係見底的。睇美匯指數呀，VIX呀，credit spread呀之類，都似乎暫時係安全嘅。但主要係大企業，中小企就真係唔少會死。唯獨係拆息就日日升，文章稍後會再講
關稅方面，跟盡下，華爾街日報話侵侵可能會停。但你知佢啲嘢五時花六時變，一日未出嚟講一日都唔好信。甚至講完都可以反口。有嘅應該會幫到市場？（https://bit.ly/2wDmi5d）
今日最想講都係香港電視（1137）。今日明報專欄有寫（https://bit.ly/39zmLmo）（＊），但我記得絶大多數內容其實都寫過了。今日隻嘢升6%，算有交代。都係嗰句，4月頭會出3月嘅數，應該係催化劑。
明報篇文都有寫到其他嘅「電視股」，我在FB Page 亦有寫有線（1097），基本上全部都死路一條。有線隨時死，吊鹽水。無線（511）未寫，舊年下半年其實極差，未有耐死，但照計都幾難搞。較為正常係電盈（8）下面嘅Now 同 Viu，但其實如果分開玩應該都係蝕到喊，主要靠好賺錢嘅電訊業務養住—所以識買一定買香港電訊（6823），派息應該算穩陣。
本地股方面，又跟進下。思捷（330，仲係咪本地股？）果然沒有最X只有更X，以為私有化，原來係德國子公司破產。另外維他奶（345）出完盈警，當然大插。大快活（52）大家樂（341）應該就因為政府近例而跌。但我依然相信本地股係有得玩的，應該話，大陸公司好多都唔係真心為股東，國情不同。樓上呢堆（唔係叫你買思捷）已經跌到極低殘，可以諗下。
續講本地股，曾淵滄啲文一向都麻麻，但今日呢篇幾好（https://bit.ly/2wMvfck），都係早排我講嘅，私有化。佢提到太古（19）。太古就真係夠晒大折讓，180蚊帳面值，股價48。問題係，入面有隻國泰（293），好難處理，財務上結構上政治上都麻煩（亦係當初咁大折讓嘅原因）。要郁太古可能先要郁咗國泰先，而國泰雖然在全球航空公司中相對較硬凈，但都話過，2月單月已經蝕咗20億，冇人幫嘅，唔會頂到好耐。係供股定賣盤定點呢？無論如何，太古大股東，至少正正常常有頭有面，唔會太過賤咁玩你。
講足兩個星期HIBOR，結果就日日升，死未。其實美金都係咁，減完1厘息，反而日日升。但開始明白到點解，因為真係大家爭住搶美金。點解會咁？原來都唔止係銀行唔借錢，而係大企業爭住借錢！
FT嘅報導（https://bit.ly/2WRtqp1，呢篇應睇到）。投資級別嘅公司，3月發債吸咗2440億美金！舊年9月以嚟單月最高了。原因好簡單，留住啲子彈長期抗戰，本質上同你去超級市場搶米差不多。咁又係半杯水，睇你點睇。你見到佢地個個恐慌，但我見到係，居然都仲借到咁多錢，利息也不見得極高，市場又容納到。似乎個金融市場仲係幾正常嘅。
再講一次，埃汾多數貼link都會揀免費source，但有時冇法都冇計。自己試下Google，好多時都有人貼在其他網站，但當然好快會畀人掃。
（＊）又，其實因為有唔同平台，開始有時邊啲嘢我在邊度講過都唔記得。肯定嘅當然係最好嘅留返畀呢度讀者，但同時間請務必睇我嘅Facebook Page（http://bit.ly/2RqXfYv），最好睇埋逢星期一明報專欄（網上有免費）。應該就齊晒了，收費就只得呢度，所以唔會漏。