In KS We trust
星期五，今個星期心情好返，一來加左人工（些少），二來出咗花紅（都係些少），但主要都係市況好返
見底啦掛？
今日題材多，大市反而簡單寫。聯儲局祭出絶招後，大市終於回穩。今次似乎係堅的了，因為見到好多其他指標都冇以前咁驚恐。倒係埃汾一路睇嘅HIBOR，升足兩個星期都冇落過。所以真係不能太墨守成規睇死一兩樣嘢。
以下貼幾個圖，話你知種種驚慌指標都已過，同埋似乎而家只係面對經濟衰退（美國申領失業救濟人數破晒紀錄），唔係金融危機。記得之前啲文都提過，08年穩住信心，其中好關鍵係各國合作，但今次最初見各國各懷鬼胎，中國美國更加互相指責。不過而家卒之見到G20齊歡唱，應該係好事
最重要嘅，美金回落，萬事大吉。股市冇乜必然，但美金強而新興市場全數仆直，差不多係定律。原因亦好簡單，純係反映風險胃納，驚嗰時個個都渣美金。
同樣道理，你見啲yield spread，全部落晒嚟。例如歐洲啲國債，呢度拎意大利做例子，當然係同德國相比。固然德國國債都有上有落，但重點係其他國家對佢嘅溢價有幾多。呢啲當然反映到市場嘅驚慌程度。你見呢個風險溢價又全面回落晒。
不過不忘戴返頭盔。見我講咗兩個星期，HIBOR就升足十日唔肯跌。銀行體系唔係危在旦夕，但都仲係比較水緊。另一樣嘢，睇呢個TED Spread亦都見到。美金LIBOR減國債，你見仲係好高的。當然水清則無魚，等呢啲嘢全部回落晒，又可能太遲了。所以都係冇話鐵律。十個指標，一個著燈你飛入去又驚太早，十個著晒又太遲，幾時都係自己判斷，否則個個都贏錢啦。
今個星期恒指升唔夠3%，睇返今個星期最強嘅成份股（左邊），好似……都冇乜啟示。同返年初至今相比（右邊），固然有部份係因為跌得多反彈得快（例如中海油（883）），但整體關係唔多明顯。
長和系
值得睇嘅，點都係長和系。最重要嘅當然係，李嘉誠父子增持，雖然7億對佢地嚟講都係散紙。你唔信聖父聖子聖靈嘅嘉誠澤鉅澤楷（澤楷冇份增持），都信下超級打工仔霍建寧，都大拿拿拎千幾萬買。行動代表一切，唔買等幾時？其實睇佢地嘅往績，你都唔使再討論咩前景呀PE呀疫情未完呀失業率升呀之類。公開地方費事講，但長實連租都唔減，但人人仲當佢係良心，證明啲形象工程真係做得好。在租戶睇當然係吸血鬼，但亦證明李嘉誠等等咁多年，真係對得住股東，為股東創造價值，其實中港兩地唔係好多公司做得到。
長江基建
除咗旗艦外，長和系嘅長江生命科技（775）今日都好強，一度升五成，收市都升三成半。肺炎試劑盒云云，仲停埋牌，唔知係cap水（好出奇？）定澄清定真係堅嘢。但唔識睇。
我鍾意嘅始終係長江基建（1038），股價早排又係香晒，相信同澳紙英鎊大跌都有關，而公司唔少業務。但樓上講咗美金跌返，英鎊一個星期彈返5%咁。不過貨幣呢啲升升跌跌都係難估，我睇中嘅係公司業務，夠晒悶，但做得相當好。公司派息連續增加23 年，我懷疑有幾多公司做得到。你諗下過去23年發生過幾多大件事？咩沙士脫歐咁濕碎唔好講，至少都有亞洲金融風暴，雷曼爆煲兩單大嘢。外國都有呢啲股票，年年加派息嘅，佢地叫Dividend Aristocrats，好似要連續25年先有資格。點解要拎咁長？因為市旺時個個都係神，但市差時先見真，25年一定經過唔同周期，有各種事情，先見到公司係咪有實力，定只係有風時隻豬都識飛。
香港電視
香港電視（1137）出完業績大插，老老實實我連份業績都冇睇，亦都唔係太關心。股票炒將來，何況業績係2019年嘅嘢，對香港電視嚟講已經係兩個世界。股價係連升N日後再跌，不代表真係對業績好失望。始終係4月頭出嘅3月數字見真章，而家呢啲位相當吸引。特別係王維基講到好似有大投資入股咁，就我崇拜偶像咁多年，唔似係吹水嘅人。咁當然啦下，入股1%都係入股。