各位讀者好。呢個收費專欄一星期寫三日，其實都令我有啲壓力。不過暫時反應其實畀我想像中好，大家嘅支持（同埋金錢）就係我寫落去嘅動力。總唔會之前三篇就李嘉欣咁樣，到正式出就變李嘉誠咁樣
大市算係強力反彈咗，但暫時都係維持短線港股好過美股。不再重覆之前寫嘅嘢，但你見恒指帳面值22700，最平係2016年「熔斷價」 0.95倍帳面值，而家去計即係等於21600—結果真係一跌到去嗰啲位就反彈，信不信由你。港股反彈力度可能冇美股咁勁，但相信下跌空間細好多。
美國啦喎，其實唔係好識睇。講平一定唔係平。聯儲局固然大把招出，無限QE都唔係重點，仲有一招係公司可以直接向聯儲局借錢，架空埋銀行，應該幾有威力。至於之前講嘅三招，美國政府直接買股票仲未出（雖然有類似嘅東西）。減關稅就有傳，但美國政府話係假消息（https://bit.ly/3ahCGXD），但我信空穴來風未必無因。你信侵侵政府定路透社？至於畢菲特，等了又等，冇聲氣，但的確不乏趁跳樓價
買嘢嘅星級投資者。
但另一方面，我非專家，但其實會擔心美國嘅疫情。唔信中國嘅數字都好，你睇韓國，意大利等等，最後都話畀你知，犧牲個人自由，封城，係減低爆發嘅唯一方法。但侵侵似乎擔心經濟多過人命（其實都係取捨，好難話錯晒），想復活節就「重啟經濟」，似乎都幾冒險。睇佢成功定成仁，但我就認為現階段睇港股好啲。
另外跟進下個股，上次好似提過思捷（330），應該係私有化。結果而家（星期三4點半）仲未有消息。停牌三日，相當少見。應該九成九係賣盤/私有化之類，好可能近期股市波動，大家拗數—因為既然出面啲股票一兩日可以爭一兩成，大家傾作價都會係咁。亦有可能係最後傾唔掂數，唔係未試過，不代表公司自編自導自演（上市公告假文書好大罪的說）。應該下次專欄（星期五）前有消息啦掛？
都話潮流興私有化，日本孫正義嘅軟銀（SoftBank），原來都諗過私有化（https://bit.ly/2UEEIdw），不過最後覺得過唔到就作罷，轉為賣資產。正係賣阿里巴巴（9988）。之前Facebook Page都寫過下，原本孫正義係呼風喚雨投資之神，但WeWork開始畀人質疑，而股價長期係對資產大折讓。所以引嚟基金Elliot 入股想佢賣資產回購股份提升價值。詳情可睇（https://bit.ly/2vNsUxf）（https://bit.ly/2wrgVGc）。結果近日軟銀股價相當強勁，其實支持咗日本股市，而唔係因為「取消奧運」。
再講多少少個股。航空公司，酒店，郵輪等等當然跌到七彩，短期都唔會考慮。但同時近期都有唔少「疫情受惠股」，就比較考功夫，有啲真係受惠，有啲只係亂炒（你唔會食多咗米用多咗廁紙）。比較似樣嘅，係啲外賣雜貨嘢．但唔係諗UberEat—叫車少咗嘅生意，外賣仔好難冚得返。
例如有乜？英國有網上雜貨舖Ocado，倫敦富時100指數今年最勁嘅一隻，一度得佢一隻升（https://bloom.bg/2UC6reW）。美國就有藍圍裙，Blue Apron（APRN），睇股價圖就知咩係來回地獄又折返人間（其實冇返）。上市都未夠3年，150蚊上市，插到2蚊。但肺炎一嚟，幾日升10倍！而家都仲有5倍。以前都寫過下呢隻嘢（http://bit.ly/2SnJOJM）（http://bit.ly/2JCcP1t）
咁香港，就梗係睇王維基，HKTV Mall（1137）。曾經寫過文，講過王維基係我偶像（唔想用呢個詞但諗唔到有乜更貼切）。唔講政治只講生意，今次疫情佢地算係贏晒口碑。原來聽日出業績，但根本不重要，反而留意佢地4月頭出嘅business update。有批評話佢高位cap水，我覺得完全係搞笑，股市就係用嚟集資。生意做大咗，股價又炒高咗，拎錢去加強基建極之合理。重點係你信唔信管理層，而我係信的。
其實我估收得呢篇文嘅好多都係Facebook Page讀者，不過如果未係嘅，記得去like返（http://bit.ly/2RqXfYv）難，最好日日嚟睇。因為其實好多時啲故事，或多或少以前都講過，我未必次次得閒由頭講起。
又，一般嚟講我貼新聞都會揀免費link，但好可能唔係我最初睇嘅source，所以如果話篇文入面冇我講嘅嘢，請諒。一般我都唔會老點你。