各位讀者好，今次係專欄正式收費第一期。首先多謝大家支持，雖然唔係話十分非常多錢，但都係感謝。有咩意見盡量畀我知。
寫市況都寫到有啲悶，市又係咁跌。暫時唔想重覆又重覆自己。不如睇下另外一啲東西。就係，私有化。
記住，每次災難都係機會，有錢人嘅機會。財富再洗牌，差不多總係富者越富。當然例外嘅係戰爭。肺炎表面不分國界，名人照樣中招，但依然係有錢人同你唔一樣。NBA球員可以奉旨打尖，早早做檢驗（https://wapo.st/39fkKvc），所以唔好以為真係「大攬炒」，人人平等。難聽講句，市好時你都賺唔到錢，點解你覺得市差時係你世界？
商業世界亦都係咁。只有無風無浪嘅日子，先有百花齊放，因為利錢深，自然吸引到新玩家入場。但到市況逆轉？就梗係汰弱留強，順應近期講嘅「本多終勝」。幾肯定嘅係，每次呢啲災難都見到行業大整合。情況就係古老故事咁講，我唔使跑得快過隻熊，我跑得快過你就得。咁咩公司會被抬離場？當然係細間，或者負債多嘅公司。
呢類市況下，好多股票都極低殘。舊年市仲係唔錯時，有合和（54）私有化（當然合和特色係個市好，但佢都唔掂）。今年早少少，有會德豐（20）私有化。吳光正而家一定呻笨，早知就遲一個月做，慳返好多。但邊有早知？然後上星期有利豐（494），今日（星期一）仲見到思捷（330）都停埋牌，可能都係私有化？
利豐私有化，在Facebook Page 已經寫過（https://bit.ly/2QDE6DW）。入面都有提到思捷，真係無巧不成話。首先跟進下，今日（星期一），利豐結果係升（唔升就假），但只係升到0.94。明明私有化作價係1.25，即係點？
好簡單，即係市場，都唔係好信私有化會成功。蘋果（https://bit.ly/2wuM4Za）同明報（https://bit.ly/2UHU4OL）都有唔錯嘅分析。我只補幾句。
首先，話私有化搵小股東笨，就梗的，史上所有私有化都係益大股東。咁另外，的確差不多所有人都輸錢，有啲小股東都好唔服氣。但難聽講句，到時咪又死死氣咁投票贊成，甚至去股東會都費事，投票都慳返。鬧幾句為啖氣啫。
所以關鍵始終任在基金股東，而不幸（定有幸？）地，Silchester渣住超過 10%。呢個基金都成日在香港公司股東名冊上出現，亦都唔係橡皮圖章。上次TVB（511）做回購佢都反對。而個重點係：呢個基金輸緊錢，而又渣得夠多，佢一個可以否定成單deal。你係佢你會點投？我估投反對嘅機會都唔細。當然亦有人話，咁嘅時勢，兵荒馬亂，基金都想拎返啲現水。都有道理，但遠水不能救近火吧？等得嚟都蚊訓。所以我認為，市場嘅嘢冇乜死錯人，私有化未必過到
咁點算？就梗係睇下其他。CFA101都教你（其實冇教呢啲），私有化對象嘅幾大特色：股價夠殘，係咁跌。另外就係市況差，而家夠差啦。仲有係對凈資產大折讓，咁呢啲其實都搵Bloomberg一睇就知。
但仲有最大嘅一個條件，亦係比較難自動量化嘅條件：大股東有冇錢。你甚麼東亞（23）之類嘅，姓李嘅根本都持股極少，亦都冇乜錢，最多賣盤，邊有錢私有化（況且都唔係大股東）。
咁香港咩人最多錢？就梗係地產佬，所以搵幾大地產家族旗下啲公司，冇乜走雞了。其實呢堆名都唔係新鮮，講極又講，不過私有化遊戲，市旺時冇人玩的，人地合埋眼都日日升幾百點，你隻嘢唔郁仲分分鐘要跌，嗰種心理壓力唔係試過都唔知。但而家市況咁嘅樣，就掉轉了，買大藍籌都日日跌（識幾多人去撈匯控（5）？），買呢啲私有化對象，唔中都未必使點蝕。
例如有邊間？新世界百貨（825）。今日忽然急升，可能都有人諗一樣嘅嘢。即使升咗上嚟，仲係對凈資產極大折讓。最重要係，之前都試過睇私有化，但搞唔掂。好多大股東都鍾意捲土重來（但要等一年），例如Joyce（647，又係吳光正）私有化就玩咗幾次，Facebook Page都有提（https://bit.ly/2WDJv1A）。而最正嘅地方係，新世界亦都係「勇於」捲土重來嘅。當年隻新世界中國（917），都係第一次搞唔掂，第二次加價搞掂。
篇幅所限，下次醒多幾隻呢類東西畀大家。話我知啱唔啱睇，定係寧願都係講返大市，定係一時一樣隨時轉下咁。