————
ETF有咩用？
首先，我成日都講，ETF係「唔買都應該要睇吓」。
因為，佢哋會話到畀你聽，究竟市場上有邊啲係強勢板塊。而只要你識得喺啲強勢板塊入面，揀啲最強勢嘅股票嚟買，咁你嘅贏面就能夠提高。
再者，用多一個角度去睇市，你對市況嘅認識，都會有所加深。所以，以後每個星期三，我都會同大家講吓ETF。
咁ETF會適合啲咩人玩？
如果你唔想煩，想件事簡單啲，想檼陣，想容易啲贏錢，咁你就玩ETF啦。嚟緊我會一路去教大家點玩，慢慢你就會發覺，你對ETF嘅認識將會一路加深。但最重要係，你會識得點樣運用ETF去幫你賺錢。
再講我喺ETF睇到嘅嘢。
升勢最平穩嘅，係一隻做「環保服務」嘅ETF，ticker係EVX。
通常我分析ETF，第一步我就會睇佢嘅持股。一睇之下，原來幾隻最大成份股，最主要都係做廢物回收。例如係WCN、RSG、WM，隻隻都升得好靚，咁你就知道廢物回收呢個行業嘅生意係正係發展得好好。
當然，呢隻ETF嘅回報真係特別慢，所以，大家亦可以自行分散投資幾隻強勢廢物回收股。
咁又有邊啲ETF會快啲？
無得傾，一定係科技類嘅ETF。
最大路，大家可以揀XLK，過去一年回報大概有45%，主要持股為AAPL以及MSFT。
或者係IGV，最大持股為ADBE、MSFT、CRM，都係有潛力長遠上升嘅股票。
另外，除咗科技股外，醫療設備ETF，ticker為IHI，都係大家可以考慮作中長線投資嘅選擇。