【莫家強】投資策略入面有四個字好重要…

喺我既投資策略入面,有四個字好重要,叫做「捨難取易」。

我喺做法好簡單,我會先以Metastock去篩選出升勢最平穩既股票。

咩叫做平穩?就係佢喺股價,喺絕大部份既時間都會上升,但又唔會升得快。升得太快,未必係好事。試想像,你未上車,如果隻股票已經挾咗上去,咁你去追貨,就有機會喺一個過高既價錢買入,影響回報。

但如果隻股票一直係以一個平穩既速度上升,咁你就唔會有呢個concern。

我追求既,唔係要隻股短線內升得多,而係要佢平穩上升得嚟,升既時間夠長。例如,可以持續三、四年以上,一直上升。

而呢啲能夠長線上升既股票,一般都會係比較優質,基本因素較好既股票。你買既時候,你買大注少少,你都唔會有任何擔心。

回報率,當然都重要。但假如隻股票,你係驚到買都唔夠擔買得大,只係敢雞仔注去買,咁我就算俾你一年賺100%,又如何?

而且,你唔可以安心買得大,長年都只能維持喺雞仔注既階段,咁你又真係可以靠佢哋致富咩?

我寧願你買返一啲你真正相信既公司。Apple、Microsoft,當然我成日都講,如果出現股災,我都會走。但喺正常情況下,你揸住呢啲股票,你係會可以好放心,會訓得著覺,而且佢哋長遠既回報絕對唔差。

所以,大家真係要諗清楚,你買股票既目標係咩。目標清晰,你就會知道你要向邊個方向去揀股票。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

 

 






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室