【莫家強】美伊衝突,往後點樣發展唔想亂估

美伊衝突,往後點樣發展,我唔識分析,亦唔想亂估,呢個唔係我既專業。以下,我會集中講投資部署。

唔好太著眼喺個消息既本身,真正要留意既係市場對呢件事既反應。伊朗反擊美國,唔使問,一定係壞消息,表面上仲係好壞、好壞既消息。但你睇吓美股期貨既變化?最初嗰吓跌幅,好深,但亦都好快就企穩。係咪真係咁差呢?又唔至於。但問題係,我哋大家都唔知後續會發生咩事。

然後,講「市底」同「大戶部署」。

全世界股市,普遍市底都好強。呢一點非常關鍵。你試吓呢件事喺跌市既時候發生?今日,啲股票一定係血流成河。但喺大牛市發生,跌完,無咁易會「第一時間」做成崩盤式下跌,跌幅會較細,亦會較易能夠企穩。

不過,重點係,我哋要點做?

好,第一樣我哋要知既係,我哋同大戶既最大分別。我哋要沽貨離場,即日已可攪掂,但大戶要沽貨,唔係一時三刻沽得哂,要清倉,幾日都唔得,一個月都唔得,夾硬沽,未沽到三成,個市就肯定散哂。

大戶沽貨,要講市場深度,要製造利好情緒,要有足夠人接貨,佢定有得沽。有朋友如果驚事件惡化會走唔切,我同你講,大戶驚過你。

之前個市咁好,第一時間實會企穩架,但絕對唔代表啲咩。我哋要睇既,係呢次既事件,會否導致大戶減持股票持倉,引發調整。

啱啱睇電視,有專家話壞消息已經消化咗。我心諗,佢何來會有信心講呢句說話。

真係,唔好因為個市既短期升跌,就咁快定斷件事會點。反而係,睇清楚大戶既手影,睇吓佢哋有乜嘢動靜,咁仲實際。

但無論如何,有呢啲事發生,你話賺得多嗰啲股票減吓磅食糊離場,我一定舉腳贊成。他日,如果個市喺咁大不明確情況下都能夠挾升,唔使諗,做Long Call都得。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

 






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室