上回小弟分析過中生製藥（1177），多謝師姐提點，觀察到國內龍頭醫藥股急回，北水轉口味，話口未完，內地新版醫保藥品目錄出爐，新增的70隻藥品平均降價60%以上，多過市場預期的四五成，中港藥股應聲大插，中生製藥有3隻藥上榜，包括結直腸癌藥注射用雷替曲塞、神經痛藥利多卡因凝膠貼膏，以及銀屑病藥托法替布片，股價亦難倖免。小弟在此謝過師姐指點，亦證明漁友們臥虎藏龍，能夠互相交流，小弟大有得着！
另外，中生製藥首三季業績亦唔算理想，純利22.6億人仔，僅增2.5%，Q3純利8.11億，按年計其實仲有些微倒退。中生製藥話，4+7集中採購入選品種銷量雖增，但大幅降價令利潤減速，而帶量採購會從試點擴大到全國，會進一步影響入選品種的收入同利潤，而公司有信心鞏固市場地位云云。上述反映帶量採購的影響正逐步反映，而國家醫保局剛剛亦講到明，要防範藥品「搭車漲價」咁話。
執筆時內地醫藥界又傳第三輪帶量採購，仲提出新玩法，通用名下最小單位的最低中標價，就係天花板價。呢輪中標企業數量將採取淘汰制，總體上採取「n-1」中標，即3家中2家，5家中4家。美銀報告估計，新規將導致大小藥廠的競標藥價明顯下調。政策密集出台，睇嚟醫藥股短期唔似有運行。
日清食品
今期小弟又試下講講由「即食麵之父」安藤百福創辦的日清食品（1475），最出名的產品就梗係合味道杯麵同埋出前一丁啦。丁麵，對香港人嚟講，作為宵夜良伴，係有一份親切感。唔知各位師兄師姐有冇留意，各式茶餐廳唔少都有提供撈丁，芝士撈丁更加係邪惡級別美食！咁一方面強化咗丁麵係邪惡食品的感覺之餘，亦反映丁麵其實係可以當正餐的；另一方面則反證咗以餐廳作為銷售渠道的即食麵，丁麵也能登大雅之堂（其他牌子即食麵多數一炒就碎），可見其產品質量之優，相信安藤前輩在天之靈也會老懷安慰。
事實上，日清幾乎壟斷了香港的即食麵市場，無論是合味道杯麵、出前一丁、公仔麵、公仔點心，以至福字麵，通通都係日清旗下品牌。日清更收購了香港捷菱（MCMS），令業務多元化，不但涉足冷凍食品、薯片零食等，更涵蓋咖啡室及西式食肆，產生協同效應。
業績分析
成日掛住食，講番業績先。日清2019首三季收入23.48億港元，按年跌3.2%；毛利7.70億，升10.7%；純利2.11億，升27.1%；EPS為19.67仙。
齋睇Q3業績，收入 8.5億，升7.2%；毛利2.87億，升15.3%，毛利率擴大至33.8%；純利7837萬，升8.8%，純利率9.2%。以增長股而言，按年增長只有個位數，難怪市場唔收貨，股價由7蚊水平插到落最低5.66元，跌咗近兩成，之後在6蚊樓上整固。
按地區分類，首三季香港業務分部收入10.75億，微增1%；業績貢獻8045萬，反而倒退3.8%。折舊開支漸漸影響香港業務的盈利能力，還好控制住小麥粉及包裝材料等銷售成本，得以抵銷有關影響。
中國業務收入15.15億，升7.2%；業績貢獻1.77億，大升39.7%！可見日清香港業務僅保持平穩，增長引擎在於大陸市場，主要有賴合味道杯麵受歡迎。家陣日清喺內地市場主要集中沿海地區如華南，未來有意拓展華北及華西的銷售渠道，預計相關分銷及行政開支將增加。
中國方便麵市場
根據2018年中國方便麵銷量排名榜，康師傅（0322）依然佔龍頭位置，阿二就係統一（0220），第三、四分別係今麥郎同韓資的農心（辛辣麵），第五才輪到日清。最重要係，日清的對手唔止方便麵，連美團（3690）等外賣平台都已成為搶客敵手，可見競爭之烈！
早前有報道指，2018年中國泡麵銷量突破400億包大關，係經濟放緩消費降級之象。官媒就即刻強調，唔係喎，市民依家買的都係高價高端方便麵，所以係消費升級至真。小弟睇過少少關於方便麵市場的分析，實際上趨勢係有唔少變化。
第一，方便麵高端化，上班族唔再只求平價及飽肚，開始接受價位較高、品質較好的高級版方便麵。第二，方便麵產品正餐化，以往方便麵畀人的印象係油炸及唔健康，但生產商實行健康化變革，推出營養與美味兼備的產品，大大減低咗「工業味」，料包也愈來愈講究，令形象健康化。第三，杯麵及碗面取代袋裝泡麵，毋須烹調及準備食具，方便性更強。第四，利用渠道提升知名度，提升網絡曝光度，包括冠名贊助知名網絡或電視節目，迎合年輕消費群。第五、方便麵市場寡頭化，康師傅及統一佔據咗60%市場份額。
喺咁情況下，日清要開拓內地市場，有利也有弊。方便麵市場成個餅造大，日清雖有得益，但被兩大麵商康師傅及統一壓住，較難有明顯突破。不過，日清本身形象高端，高級版杯麵逐漸被市場接受，則有望透過高端麵市場打開缺口。
業務分析
日清在內地市場，其中一個重要客戶群係年輕人。家陣抖音令內地年輕人（手）機不離手，好多美食都跟住火了；在眾多美食中，方便麵已經不可或缺。據內地網民稱，日清的合味道方便麵在抖音上很爆火，「不仅面饼吃起来很筋道，就连方便面的汤汁都是很鲜的」，真係睇到小弟幾乎都想即刻淥番一個祭下五臟廟。另外日清亦着重細節，改良杯麵設計，例如在加入分隔餐具與麵餅及調味料的內層，令餐具唔會沾到麵餅及調味料，更加衛生。
事實上，日清在打開年輕人市場方面不遺餘力，效果上亦睇到係幾成功。例如最近就同人氣動畫《刀劍神域Alicization》聯動，由熱門動畫人物食杯麵來賣廣告，真係創意無極限。（漁友們掛住睇股，如有興趣，可透過 https://youtu.be/UJzVgZFaz_M 呢條連結睇下動畫，輕鬆一下）
日清亦與Kagome合作，進軍蔬菜汁業務，並拓展非即食麵類別產品，例如薯片、糖果、冷凍食品及飲料等，希望有黑馬產品誕生。另一方面，原來日清都係人造肉概念股，佢年初同東京大學共同宣布，成功利用牛肌肉細胞培養出人造牛扒，據講口感好逼真（小弟無緣親嘗），有望逐步取代傳統肉類咁話，雖然未商品化，但若市場接受，生產成本有可能大降，不過應該唔係短期內的事。
資產負債方面，日清接近無借貸，銀行結餘及現金16.1億，流動資產淨值21.62億，財務非常穩健。
日清今年中收購咗珠海一幅3萬平方米的廠地，將投資1.8億人仔興建生產包裝材料的廠房，預計2021年完成，將有助降低生產成本，同依家珠海的生產設施形成協同效應。
券商報告
日清Q3業績後，日清上市保薦人野村出報告，提升日清目標價至8.2元，認為內地收入增長強勁，產品平均售價提高後，2020年利潤率可望擴闊，但EPS則有所調整，2019、2020及2021 EPS分別為0.24、0.28及0.32；以派息比率約50%計，每股派息分別為0.12、0.14及0.16。
日資瑞穗證券其後出報告，亦值得一提。該行指市場對日清Q3業績後的反應過敏，佢哋同日清管理層傾過，香港業務仍然穩定，收入減少主要係香港捷菱的產品組合有變動，但應屬一次性開支，而且也是捷菱最後一次調整產品組合。而香港產品於7月開始加價，亦未影響銷路，估計Q4經營利潤率有望擴潤至9.3%。內地市場方面，康師傅及統一亦開始進軍20蚊人仔一個碗麵的高價麵市場，但相信唔影響日清5至10蚊人仔的目標市場。不過，該行調低日清2019及2020 EPS至0.25及0.29，目標價由6.97元降至6.64元。
大摩之後出報告，睇好即食麵行業受惠內地消費升級，認為日清係內地第二大的高端即食麵品牌，而且定位獨特，有望奪得更多市佔率，目前內地有六成銷售在華南，正開拓華北的分銷渠道，而前年來自華北的銷售額增長咗兩成，未來兩年收入增長可跑贏同業，給予日清「增持」評級，目標價8.6元，仲高過野村。不過報告的刺激短癮，股價現在仍在6蚊邊上落。
估值及走勢分析
小弟嘗試為日清估值。套用漁夫系統「估值」、「包裝食品」、「市值高於50億」等條件，可搵出6隻食品股，以最近磅的康師傅睇，市盈率23.81倍，PEG 0.89；股價一直強勢的旺旺（0151），PE 20.46倍，PEG 0.7。至於日清，股價跌番兩成，PE 27.36倍，先叫多番啲啲吸引力，PEG未有數據。
點解市場畀日清較高估值？因為市場寄望憑住品牌殺出血路的日清，可以重演維他奶（0345）在內地市場的故事！不過，維他檸檬茶爽過吸大麻，當中有運氣成分；合味道杯麵，會否食完似「上電」（教壞細路添），就只能放眼量。
股價表現方面，6隻股份中，年初至今以日清跑贏晒，升72.8%，但最近一個月即Q3業績後則跑輸，跌幅12.4%。另外，上述6隻股份之中，市值以日清的70億最細，如果開拓華北市場成功，爆發力或不容小覷。
可能由於資料不足，日清股價未有「破」訊號。從走勢睇，Q3業績後股價失守50天線，一度插穿150天線，翌日拗腰企番穩，至今在150天線（6元）之上徘徊整固，師兄師姐如有興趣跟進，可以此線作參考。不過，港股市況近排走弱，中美貿易戰又沒完沒了，對港股睇法似宜保守啲。
漁勝