[諗SIR]理財單車論 – 談債券計價及雷曼一役 (2013/06/25)

 >>>去上回:跌市撈金如在斜路開車

繼承本樣同大家談及的理財單車論,諗樣好想簡單易明咁同你講解何為債券。而港人印象最深的,莫過於2008年金融海嘯後「呃左阿婆錢」的雷曼債券。

 

「雷曼債券」是已倒閉公司雷曼兄第發行的,不過有發行同種類「債券」的不只雷曼,其他公司都有發行,大家只不過統稱該類型累你輸錢的債券為「雷曼」、「迷債」等等。「雷曼債券」其實唔係債券,係一個衍生物,即幾個期權再加信債掉期種種,複雜到你唔信,不過設計出呢樣野既人就發左達! 其運作就是你比一萬蚊,佢會將一萬蚊的大部份去買美國國債,而最重要是同你參加左個「賭博」計劃,買左關於一籃子5-7間公司的一份契約,如果該籃子公司係幾年內倒閉,你要將原本買左美國國債既錢賠比「賭博對手」,唔倒閉就每季收息,4-8%年息不等。由2004-2008年都相安無事,不過係2008年真係有籃子入面既一間公司執左,就係雷曼啦!

 

雷曼倒閉有兩類投資物受損,一當然是雷曼自己發行的「債券」,即衍生物。另一是籃子中包含雷曼的衍生物,內裡講明只要七間公司入面其中一間執左,買者都會total lost。不少銀行客仔都投訴話銀行職員冇同佢講過「只要其中一間執左,都要全蝕」,諗樣都相信肯定當中有幾個個案冇,但文件都簽哂,唔通真係同銀行打官司咩? 況且銀行大條道理話客仔由2005年買起收6%年息都收左幾年,做咩2009年出事後先嘈呢? 客仔同銀行因此疆持了大半年時間,真至2010年海嘯漸退,之前買入的美國國債回升不少,銀行計過數知自己賠唔係好多之後,倒不如洗些少錢,打發門口日日嘈既婆婆。

 

此役令你知道,一是有錢人不能得罪! 二是有時間兼好很等閒既阿婆都唔好亂得罪! 普通市民當初不細想就買入,因大部份人都相信該投資物上冠有「債券」名稱,理當風險不大。而批出該物可用「債券」一名的,實是證監會。可以由證監燒上去一定燒到財爺度,那不如先出手「斬殺」市民及銀行,一場雷曼風波到此幾近平息。

 BOND2

另外有人買左雷曼出既股票掛勾同窩輪,此等人要輸錢實在難免。就好似你存錢係該銀行而及後倒閉,你唔係諗住攞返呀!? 當然現今香港有存款保障計劃,是每人頭每銀行保障你五十萬,比其他地區已強多了!

 

用左一段篇幅講雷曼,係時候「返正途」談談債券。債券報價係股票機比較難搵到,你可以去金管網頁搵到債券報價網站。

https://www.cmu.org.hk

 

下圖可見由中國銀行提供報價,發行人為中國農業發展銀行的債券。風險在於中國農業發展銀行會否違約或倒閉,本文只作教學用途,詳情及銷售文件可向報價者索取。

 

收費

要留意是呢隻係人仔債,即用人民幣結算。亦有花名叫點心債,因為是人幣計價的海外發行債券。債券買賣一般不收傭金(commission),但有買賣差價。出比你就101.22, 收回就98.92,你見到個出入價爭成2.x%(101.22/98.92),其實出入價唔係平。

 

回報:

投資一定要講回報,此債券票息為3.2%,但發售孳息率為2.35%,那究竟我買左一手(即RMB10000)要用幾錢同收幾多息呢?

答案係你要先比$10122(因賣出是101.22)去買入價值$10000的債券一張,而該債券每半年比$160利息你,全年收$320息即3.2%。由於你開頭比突左$122去買入該張債券,如果你持有到到期日2015/01/19仲可以收三次息,你實在的回報為$((160+160+160-122)/10000)*100%*(距到期日數/365)=2.35%

 

補息予上手:

在此例子你在7月25日買入債券後,你可以在2014/01/19收足全期息,即2013/07/19至2014/01/19的累有利息$160,而上手賣比你既人就一蚊就攞唔返。為公平起見你要將2013/07/19-2013/07/25的六日息補返比賣家,所以你買入時交出的款項比$10122略高,為$10122+$320*(6/365)=$10127.26

 

今日到此為止,上文係筆者在銀行工作多年,對債券有興趣的客戶常解答的問題。本樣最能幫你的,是知道一大堆港人內地人想問的投資問題。至於經濟學家鑽研的課題,一來我未必識,二來你冇興趣聽。所以文章都是實用性高的好!









 


本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室