【莫家強】美國宣佈對歐洲貨品加徵關稅

美國宣佈對歐洲貨品加徵關稅,唔太關中國事,所以港股既跌幅都相對温和。

不過,雖然係咁,但港股下跌股票既數目遠超上升股票,整體市況都係麻麻地。

至於美股,近期既表現比港股更差。但對於我哋嚟講,反而係好事。因為,我哋可以有機會,喺更低水平買到啲優質股票。

噚晚,道指大跌494點,大部份藍籌股,跌幅介乎1%-3%。但美股既短期走勢仍然好差,要再睇定啲,我先會考慮入市。

咁會唔會有反彈?

一定有,但我既目標唔係博反彈,我貪心啲,我要食一個大浪,要贏一個買完股票,可以坐上去既大浪。所以,我唔會在意反彈。

我會觀察既要點,係邊啲股票喺個市差既時候,已經有跡象唔肯跌。而個市一好轉,就立刻肯升。

蘋果公司,除噚日以外,近期都做到。兩隻信用咭股,噚日都跌超過2%,但再前一日企得相當穩。Nike,跌少過1%,而且接近尾市曾經做過日內高位,加上有業績支持,都係我留意緊既股票。

暫時,未係出手既時候。無辦法,時機未到,所以遲遲都未再出手。到我出手既時候,會再update大家。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

 






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室