【莫家強】期權短評 – 首天出每週指數期權

今日,第一日出每週指數期權。

十點前,完全無莊家開價,好明顯港交所自己都未準備好。到咗10點後,終於有價,但開價質素仍然同原有既指數期權有一段距離。接近「等價」位既期權,買賣差價達到10%,並不理想。

睇多一兩日,如果開價質素仍然係無改善,大家不如就玩返原本月尾到期既期權好喇。

但如果呢個產品攪得好,對大家嚟講會係一個好好既賺錢工具。

「末日」、「等價」既期權,時間值損秏極快,只要對沖得好,用嚟賺時間值,一流。希望港交所可以做好少少。

至於美股倉,清咗好多化貨,揸緊大量cash。

有朋友問,可以買得返貨未?

我自己,其實每日開市都有做功課,暫時,唔覺得真係極好既買入機會。

SHOP,已明顯轉差,唔好掂。MA,我非常有信心中線會再升,但短線都有危機,都唔會買住。HD,好靚,有貨應該繼續揸,但又未係適合再加注既時候。

至於另外都有啲股票跑緊上嚟,呢幾日,我係忙緊睇佢哋既基本因素。

睇基本因素,係要花啲時間,唔似技術分析咁,set 幾條formula,用電腦scan一scan就攪掂。但呢啲時間,絕對值得花。

一隻股票,如果走勢又靚,基本因素又好,中長線再升既機會好高。兩者缺一,點都爭啲。

再者,沙特油田被攻擊,定有後續事件發生,都要留意住。

但總括嚟講,最緊要都係睇住邊啲股票,喺跌市既時候都唔肯跌,呢啲股票,喺市況回穩後,會有較大機會大升。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

 






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室