【莫家強】期權短評 – 出好消息而股價跌

出好消息而股價跌,永遠唔係好事。我講既,係港交所。

尋日既財經新聞中,最矚目既一單,一定係港交所提議同倫敦股票交易所合併。

我自己睇完呢單新聞,都心諗:「唔係掛?」

然後,第一個想法係,都算係好消息嚟既。

不過,我經常都講,唔好將焦點都放喺消息既本身,而係要集中睇市場對呢個消息既反應。所以,有朋友問我點睇,我都話最重要係留意今早港交所既表現。

今日,好明顯,市場係睇淡呢件事。同時,亦有大行都出咗報告,話畀大家知,佢哋點解睇淡,有興趣,大家都可以睇吓。

********************************

另外,有朋友做咗東亞既Short Call,尋日大市急升,隻股上升,SC倉位都有啲虧損。但今日,指數其實無乜點跌,但東亞既股價,已經打回原形。以下想講兩點。

第一, 造淡一定要計好風險,如果股價挾你一兩日,你已經驚咗,咁即係代表你既風險管理做得唔好,會好易輸錢。而做得好風險管理,唔驚,贏面就會大。
第二, 一隻弱勢股,喺條件無變好既情況下,你要有信心佢一直下跌。只要計好風險,有適當既止蝕位,就可以放心坐啦。

東亞係一隻穩步下跌既股票,由2018年3月開始就一直跌,中間雖試過大反應,但彈完都係會再破底。個人睇法,佢會再跌穿9月初低位既機會好大,計好風險,用啱策略,造淡有值博率。

至於美股,指數升,但好多強勢股都回落。有啲我自己好鍾意,但近日表現轉差既股票,我都沽咗。下一步,要細心觀察啲資金流去邊度。

等我觀察多一兩日,有明確啲既睇法,再update大家。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

 






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室