【莫家強】期權短評 – 恒生指數唔差,但衰股唔少

去完新加坡上堂,尋晚返,無講幾日市,今日寫少少update。

先講港股。

簡單兩句說話總結,恒生指數唔差,但衰股唔少。

恒生指數,已去到接近阻力位,但表現仍然硬淨,加上偶爾日子成交都足夠,唔好唔差,無乜睇法,重點唔放喺度。

咁重點放喺邊度?

揾衰股,開淡倉。

咩叫衰股?三個要點:基本因素差,市升佢唔升,市跌佢跟跌。呢啲股票,喺港股內,為數不少。如夾啱股票期權開價OK,而你又識得點玩的話,不妨開吓淡倉。

你有無買過衰股既經驗?市升佢又唔肯升。到個市跌,以為佢會跌少啲,sorry,佢跌得仲多。個市仲好地地,佢已經跌穿底。偶爾都會有反彈,一日半日都有機會升得唔錯,但無耐又再跌過。呢啲股,買咗,你會好慘。但攞嚟造淡,咪啱囉。

但記住,做淡倉,一定要識得控制風險。Debit Spread 又好,價內SC 又好,識處理風險先好做。

至於美股,情況都幾複雜。

前一個星期推介既Home Depot,升得好靚,繼續揸。靚公用股,又係,無嘢要擔心。兩隻信用咭股,破咗頂先回調,純粹睇一日好似幾肉酸,但節目講過,正常。如能夠企穩再上,無貨可以買,有貨可以加注。

比較令人擔心既,係Shopify。8月30號已經講過,Shopify當時已有整固跡象。過咗個幾星期,有唔少股都有得升,而佢都唔升。到尋日,已跌穿止賺/止蝕位,走啦。隻股升咗咁多,一轉弱,就要走得快,否則真係唔知可以跌成點。

至於文章提過既3隻交易所股票,吼位買。有通道,大家就知咩位出手既值博率最高。

明天介紹班會講更多。報咗名既朋友,到時見。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室