買股發圍? 月供股票想脫貧? #1898

諗sir,您好!麻煩有少少野想煩請您教導一下,

 

講左小小背景先,

小弟,今年30,已婚,

同老婆一樣,公務員,搵2萬8

2個小朋友,分別3歲同6個月

 

有層私樓,買入價595萬,眼見地產賣緊750-800, 8成按,每月還1萬8,層樓放租,放番1萬8,依家自己住緊宿舍,每月開支,

工人:4500,小朋友學費5000,興趣班3000,家用12000,

月供股票:8000,分別係823,66,1211,2800,007,係376時買左2手,番唔到家鄉,

 

重有其他燈油火蠟,同埋食飯搭車等等,而現金有20萬,想煩請諗sir您指導一下我,依家可以點做先可以改變現況?同埋,學報諗sir既班,煩請諗sir指導下,現時情況,最應報諗sir既咩班最合適呢?萬分感激thank you  

 

answer:

公務員好處是用原本人工借錢較易,但就不可另設兼職收入去增大自己借貸力。故讀者應物色一位親人,最好親人本身高薪,或最起碼提供到一個「人頭」,比讀者日後買第三間樓。讀者夫婦工資共56000,借貸力為56000/10000*50%*2.59 = 725萬,此數不夠買三間。加上工薪大升對公務員不樂觀,所以要發圍,本案讀者要諗點借銀行既力。

 

至於現樓賺價唔深,如賣可賺150-200萬不等,同儲蓄只20萬的讀者算很有吸引力。然而讀者在理財上未有紀律,儲蓄少的人理財紀律多不夠,令筆者擔心一旦套到200萬返黎,亂洗哂或膠入股票咁就出事。故無論樓價升定跌,讀者宜守住呢間樓。當然間樓讀者八成上會而自己住宿舍,即佢間樓可能偷出租中。要明解一旦被銀行揭發將自住樓偷出租,後果為何? 將自住樓出租本身沒有違反法律,但同事在申請過程之中做得唔好,可能由簡單違反商業合約變成刑事罪行,要分清條界線。

 

地鐵同領展呢類大路股,月供咁儲係唔會幫你5倍/10倍咁贏。希望大家不要荒廢本業,而妄想在股場搵捷徑。當然讀者溫和地買些大籃籌,可能同街外人打成「同輸同贏」之局,此局面對於已有些財富或幾間樓揸手既人可以,但如你年青及資金較少,你要成「人輸你羸」才可發圍。發圍之法建議:

  1. 可以買股票,但要係人人信心最差而買入行業內的「死淨種」,一旦衰退完成「死淨種」公司會食埋人地個市場份額,更易爆升
  2. 人有生老病死、生意都有。所以買股應食完爆升個浸就放,唔係長揸。你留意股票之發明,源於荷蘭有人想夾份租隻船出海探險,船返到黎就有寶大家分
  3. 咩係信心差? 當全市場的股票,現價低於250天線的股份比率少於15%,那個叫差。咩叫死淨種?你留意一個版塊內的股票,同盈富基金走勢相比,那個相比下走得最強,那個應是王者無疑
  4. 筆者少睇年報決定買股(但當然未致於唔睇),你看有時出業績之前,有些股價已炒上了。所以價格走勢就是說明未來看好定看淡的最指標
  5. 經過地鐵撥備、煤氣又話要重估物業,你認為睇年報可以作決定之「主菜」嗎?
  6. 由於往後估計稅務減免會多,筆者自己公司都採用會計技術將呢年盈利延後。其實股票市場的發明,是益了小投資者定大老闆? 利申一下,筆者自己有時間都去做大自己盤生意,而唔會鑽研股票。賣(發行)股票就肯定賺多過買股票的

 

計埋手上股票及現金,筆者認為可將手上50萬咁重組:

賣走股票全套現金後,50萬當中之30萬買債基,利用收息101課槓桿後派10%息的,可保證自己三年後有30萬*10%*3 = 39萬。由於債基可買美國國債為主的,風險不大,此法可確定讀者三年後起碼有39萬在手。認識筆者理論,可由讀收息101做起。

 

50萬其中之20萬,現在先買黃金有關的ETF,或看好美國減息之ETF。下圖展示此等ETF在少於一年就1到3倍之升幅,收息104會談此等ETF。另外看淡/好英鎊、或派12%-20%年息的REITs都會有。

 

看好美國減息之ETF,$15>$33.73

黃金有關的ETF,$14升到$40

當一旦恐慌美國要減息同埋金價真再爆,到時take profit再慢慢係港股選好生意買未遲。咁做就真係可趁亂去賺多100-200萬,買第二間樓啦。當然我們假設最worst,就係金唔升或狂跌,世界亦沒恐慌大和平,咁讀者輸哂$20萬,3年後有39萬係手。留意我們做投資決定,要理萬一睇錯自己輸到去邊,而唔好一咪估升跌。至於傻更更咁月供股票認為十幾年後會好的,一班上市公司主席會對住你笑。








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室