今日，想首先分享我以前輸大錢既經驗。
論輸得最甘既，一定係2008年股災，輸既金額，大概過百萬。
點解會輸？
一句，「貪勝不知輸」。之前一兩年，玩窩輪，keep住都贏。甚至如果大家記得，2007年7至8月，港股有一個大調整，但so what，個市一反彈，我就賺返之前輸既錢。恒指最後升至接近32000點，我當時手上有過百萬利潤。
但就係咁，好心雄，唔識驚，最癲既時候，我每日係揸幾十萬窩輪過夜。
幾十萬窩輪，遇上跌市，一日可以輸十幾廿萬。但最大件事係，當時輸十幾廿萬，我係連驚都唔驚。每逢出現入市訊號，我仲要加注。阿媽見唔對路，已經叫想叫停我，話趁仲有錢賺，唔好玩喇。我無聽。
最後，好快，就輸到無得玩。
事後睇返，衰幾樣嘢。第一，overtrade，玩得太大。第二，盲目，大市問題已好明顯，都唔識走。第三，無底線，無限住自己最多輸幾多，就要停止。
「好彩」，Long Call最多只係會輸放出去既錢，唔使補倉，否則我可能會連累屋企人要再攞錢嚟還。
>>>>>>>>>>>>>>>>>>>>>>>>>>>>>>>>>>>>>>>>>>>
隔咗幾年，歐債危機，又係輸得好甘，嗰次係輸Short Put。
當時，我玩Short Put，比今日狼死好多。唔係玩十幾張，係玩幾十張以上，亦唔會做對沖。
無事無幹，真係好爽，收時間值好過打工。但Short Put既問題係，一到跌市，一漲窩，如果第一時間你仲唔肯走，再跌就好大件事。
其實最初，有段時間，係可以輸少少錢就走人。但就一直無走，又無減倉。直至，歐債問題惡化，去到一個位，係到無選擇之下，我先斬倉離場。
>>>>>>>>>>>>>>>>>>>>>>>>>>>>>>>>>>>>>>>>>>>>
2013年錢荒，又係輸Short Put，最多輸過幾十萬。但嗰次技術好咗，同有啲運，三個月左右，就追返哂啲損失。情況其實同歐債時有啲似，又係輸一兩萬既時候唔肯走，輸七八萬既時候，更加唔想走，到輸幾十萬嗰陣，只有硬住頭皮賭埋佢，好彩最後賭得贏。
但我可以同大家講，我有兩個星期係完全訓唔到覺。因為，如果賭輸，係唔知可以輸幾多。
有啲策略，你係可以博，可以守，但Short Put，絕對唔得。有事，一定要走。
而且，事後我又諗返，如果我喺輸幾萬蚊以內既時候已經肯走，到真係反彈嗰陣我先再入市玩，我應該唔單止可以追回損失，而係可以賺到錢。
>>>>>>>>>>>>>>>>>>>>>>>>>>>>>>>>>>>>>>>>>>>>
今日，我既諗法係，輸細錢，唔好太介懷，呢個係投資既必經階段，唔會可以完全避免。但輸既數額，如果可以控制喺本金既10%以內，到個市好返，要倒賺，一啲都唔難。
但就永遠唔好俾自己有機會輸大錢。假設，你既本金無咗50%，即係100萬錢輸剩50萬，你要變返100萬，就要賺一倍，唔係咁容易。
>>>>>>>>>>>>>>>>>>>>>>>>>>>>>>>>>>>>>>>>>>>>
我知有朋友想博Trump 反口，博大市反彈，無問題。但要注意兩點。
1) 你既策略，風險如何，最多會輸幾多？
2) 博，你係為幾多回報去博。
Short Put，我會建議走，唔好博。如果你係上星期喺高位開倉，今日應該都要輸錢，但肯定唔會輸得太甘。我會建議，走啦。
如你仍然想留好倉，最重要係確保個策略，唔會有機會輸大錢。
或者，其實可以借呢個機會，轉玩美股。與其博港股反彈，倒不如等美股回穩，博啲強勢股而破頂長升。
風險聲明：筆者為證監會持牌人。以上內容並不構成投資建議。投資者於投資前必須充分了解產品風險，自己的財務狀況及投資目標，並諮詢專業顧問。