【莫家強】期權短評 – 君子不立危場下

早少少講吓點做。

噚日都講,如果美股能夠反彈,就乜都唔使做。本來,都升得幾好嘅,但直至Trump 出twitter,個市就立刻急插。

我嘅建議係,美股,按照計劃走1/3。

兩隻信用咭股,以及微軟仲係好強,個市咁跌法,佢哋都仲keep到升幅。但如果個市繼續轉壞,幾好嘅股票最後都會跌。

先走1/3貨,再跌再走。如果係一早跟上車嘅朋友,仲賺緊咁多,照計執行上肯定唔會有問題。

咁假如啲貨真係好高位追,要輸錢,走唔走?

走。個市唔會理你啲貨係幾錢買,要跌,就係會跌。亦都係,過往啲股災,就係呢種心態,唔肯走,先係令你輸大錢嘅主因。

何況啲股票,就算由最高位計,都唔係跌咗好多。早走,只係你心理上覺得唔抵,實際上唔係輸到啲咩錢。但你唔走,再拖,往後就好難講。

唔知個市往後會點發展,但要避股災,關鍵往往係你嘅第一步嘅行動。第一步做得好,往後就唔使驚。係如果你第一步做錯,往後就會進退失據。

君子不立危場下。

唔好估個市會唔會大跌。策略好簡單,跌就走。到有一日,個市回穩,再升,就追返啲貨。

過往幾個月,我應該會俾大家睇到,喺升市入面,啲強勢股係可以升到幾癲,你揸啱股就會賺到錢,你根本就唔使擔心啲股會無上升空間。亦都係咁,你更加唔需要喺呢啲前景不明既時間博。

至於港股,情況差好多。

中美問題,係中港股市嘅死穴。有好倉,走啦。其實你真係唔知,點解又會係咁。係邊一方唔守信用,無人知。但肯定嘅係,美國係主導嘅一方,完全控制住局勢。Trump 要做嘢,之前傳過招行嗰啲,再攪你都唔係問題。

暫時寫到呢度,睇下開市後港股表現先,一陣再出post 補充。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

 

 






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室