【莫家強】期權短評 – 恒生指數既阻力位 28800至29100點

之前講過,恒生指數既阻力位,大概喺28800至29100點。以近日港股既表現去睇,恒指的確有機會上試呢個水平。但要徹底長線轉跌為升,我相信機會唔大。

港股,可以繼續用期權收住時間值先。有錢賺,就可以用呢啲錢買落啲強勢美股度。呢個就係我依家既玩法。

美股,實在比港股強太多。例如係Microsoft,年初既今,股價經已上升36.75%。Paypal(PYPL),再跑贏少少,升43.77%。Mastercard,表現更佳,能夠升48.09%。如果夠膽玩規模細少少既科技股,Shopify(SHOP),升134.03%。

鍾意穩陣,可以揀公用股,當然股價升勢唔會有咁勁,但例如係Nextera(NEE),都升到22.98%,回報一啲都唔失禮。

以上呢啲,都係好優質既公司。除咗潛力股Shopify變數較大之外,其餘幾隻,只要股災一日未出現,佢哋既股價好大機會能夠一路升上去。

有啲朋友,始終都係怕高,唔敢買呢啲股票。以下試下可唔可以改變大家既諗法。

第一, 記住呢句說話 ─ 平嘢無好,好嘢無平。

優質既股票,好少會長期平賣。相反,長期平賣既股票,好少會係好嘢。

第二, 用喺市場賺返嚟既錢去買。

期權,有一啲策略,係可以俾我哋好穩定咁,每月賺取現金流。就用呢啲每月賺返嚟既錢,買強勢股啦。

美股有一樣最好既嘢,就係你可以一股股咁買,入場費勁低。所以,就算用每月賺既時間值嚟買,你都仲可以分散買幾隻。

配合期權同股票,就可以製造到一個輕鬆、贏面大,潛在回報又唔錯既策略。

只要美股牛市繼續運行,幾個月後,我相信利潤都會相當理想。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室