【莫家強】期權短評 – 強勢股,繼續揸住就啱架喇

有朋友問,今日點解升咁多?你睇下啲牛熊資金流,就會明白。

噚日,熊證相對期指張數增加咗過千張,而牛證則減少,加上外圍又升,就造就咗今日既升市。早兩日話,大市有機會反彈,好喇,依家反彈咗,講吓下一步點部署。

恒指阻力位,大概喺28800至29100點水平,未到呢個位前,阻力唔算大,如市場氣氛繼續正面,指數應該仲可以再升少少。

到升到去阻力位,就留意以下幾樣嘢:
1) 大市成交。呢個係有無資金重投股市既指標。睇住喺升市既日子,會否見到有900億以上成交。無,個市喺阻力位之上好難企得揾。
2) 升跌股票比例。今早,有785隻升,573隻跌,唔算好理想,但都唔算差。但如果之後既升市,又變返跌既股票多過升,咁就代表大市既根基無乜改善。
3) 早兩日講,港股有機會短暫跑贏美股,今日,勉強都算。但往後,如果又見美股升而港股不升;或美股小跌而港股大跌,咁樣,又係要小心。
4) 留意住熊證有無補充。有補充,就容易挾多啲。

簡單而言,繼續睇恒指會有反彈,到阻力位再考慮能否加淡倉。到時再update大家。

而美股,就真係靚仔。好多強勢股,噚晚又再破頂。揸住呢啲破頂股既朋友,繼續揸。有好既股票,都要你有耐性,先會賺到大錢。

總之,呢啲強勢股,繼續揸住就啱架喇。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室