【莫家強】期權短評 – 「10點半」過關,恒指有機再升。

「10點半」過關,恒指有機再升。但噚晚拍片講過,最理想既情況應該都只能升到28800至29100點,仲要未必到,博唔博,大家自己考慮。

我自己無博,第一,雖然估到有機會反彈,但實質操作要賺到錢,唔係咁易。第二,係無必要博。因為,有跟住買美股既朋友就會知道,兩隻信用咭股,噚晚股價又再破頂。

港股,上升空間唔會太多,但美股,只要你揀啱股票,股價我相信仍會不斷破頂。而做到兩個市場既強弱差距,原因好簡單,就係企業既盈利前景。

港股,keep住都有股票出「盈警」。對於出盈警既企業,我會特別留意管理層既講話。如果你條數已經唔靚,而我又聽唔到你有啲咩實質方法,可以令公司走出困局,咁隻股我覺得已經係certified。

我預期,呢類股票,喺港股將陸續有嚟。

相反,美股,好多股票既業績仲係好靚。

無錯,整體美股估值已經唔平。但有個concept大家絕對要攪清楚。估值平貴,一邊係睇股價,一邊係睇盈利前景。有盈利前景既股票,股價就算一直升,都可以係唔貴;無盈利前景既股票,股價就算無升過,都可以係貴。諗得明呢點,你揀既股票就會唔同,而你既投資回報就會反映。

我知身邊有朋友開咗港股淡倉,不妨食吓糊先,等高位再做。對於港股,中線未跌完既睇法,仍然未變。

美股,不斷破頂嗰啲股票,要耐心一直揸住。有靚股,無耐性,你都唔會賺到大錢。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

 






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室