【莫家強】期權短評 – 港股流走既情況都幾嚴重

大市成交,今早只有318億元。呢個數,係今年新低,亦顯示資金從港股流走既情況,都幾嚴重。

仲有無得升,唔知道。因為,愈細成交,代表大戶愈容易可以將個市舞高弄低。但如果短期內,個市真係被挾上去,而成交又無顯著增加的話,我會加淡倉。

但無論如何,港股既中長線前景,我完全唔睇好。

另外,李小加好自豪咁話,要帶阿里巴巴同百度嚟香港。阿里巴巴都仲好啲,百度?帶返嚟做乜嘢?

點解咁講?

你睇吓百度既股票圖,就已經可以想像到間公司有幾大件事。有興趣睇埋佢既業績,你會更加擔心佢既前景。呢啲股,拜託,真係唔好嚟香港。

如果大家想買科技股,我建議,你去買美國既科技股。喺百度股價大跌既呢一年間,好多美國科技股都keep住破頂。

唔識揀,就分散買幾隻最大,又喺過去幾個月不斷破頂既科技股。識揀,會有上升潛力更大既選擇。

但記住,股價永遠都係強者愈強、弱者愈弱。百度,雖然股價由高位已經跌超過一半,但唔好因為咁樣而買佢。佢跌咁多,係有原因。

不過,唔好花太多時間去研究百度喇,無乜意思。係研究,都研究一啲有上升潛力既股票。

好多優質既科技股,股價雖然已經升咗好多,但你如果細心研究,你就會知佢哋升咁多,亦係有原因。而且,佢哋既盈利增長,有排都唔會到頂。

玩美股,我既做法好簡單。如果美股市場出現股災跡象,幾好既股票,我都會走清。但一日未有觸發股災既條件,呢啲上升既好股,我會一直揸穩。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室