【莫家強】期權短評 – 港股絕唔出奇有反彈出現

唔好對港股抱有太大期望。

港股,有反彈出現,絕唔出奇,但要徹底轉變為升,我睇可能性不大。原因,係由於整體港股既質素日漸轉差。

經濟好唔好,當然對整體股市升跌會有影響。但就算經濟唔好,都唔代表無股票可以升。例如近年港股,就有領展(0823)、煤氣(0003)、維他奶(0345),做得唔錯。

以上公司,共通點係管理層都係好腳踏實地去做生意,有問題,會諗方法解決。

另外有啲股票,我講過,例如係東亞(0023),市升佢又唔升,市跌佢又跟跌,呢種股票走勢,反映緊啲大戶,其實係無信心管理層可以帶領公司走出困境。

事實上,你聽下佢哋既業績發佈會,你就會聽到佢哋管理曾層係完全滿足於留喺現有既comfort zone,唔願意走出去。但佢哋喺世界各地既同業、對手,已經走到好遠。即使經濟好返,我敢講,呢間公司應該都難有作為。

而港股最大既問題係,愈來愈多股票,都走緊類似東亞呢條路。

另外,要留意,港股既成交額持續低落。呢類情況下,無乜可能容納到阿里巴巴回流。

有朋友問:「會唔會先挾高個市,等氣氛好啲,先俾阿里巴巴返嚟?」

我覺得有機會。

但點都好,馬雲會否按照計劃,於9月就退休?馬雲退休後既阿里巴巴,又剩下幾多價值?

馬雲,係一個好叻既人,佢對科創局勢睇得好通。2017年,有一個場合,佢係同林鄭月娥同場講創新。當時,佢對林鄭一啲都唔俾面,但你會好清楚睇到,點解阿里巴巴可以咁成功,而香港既創新就咁失敗。有機會再同大家分享。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室