【莫家強】期權短評 – 都係繼續賺住時間值先

純粹睇呢兩日,港股既表現其實都似樣。今早,大市成交有487億元,唔算多,但都唔算少。上升股票數目有872隻,下跌股票數目只有561隻,以升跌股票比例去睇,亦都OK。所以,暫時我都唔會考慮以Long Put造淡。

現階段,都係繼續賺住時間值先。用啲升又賺、跌又賺既方法坐住先,你會發覺你既耐性會可以改善。

總之,留意住噚日講過既條件,如果符合到,有機會開淡倉,先會出搫。此刻,不必心急。

但雖然港股反彈,但相對嚟講,美股真係強太多。

恒生指數,由5月初30000點水平開始下跌,至6月4日低位約26700點,低幅達3300點。當然,呢幾日走勢好轉,同低位比較,已回升達1100點。

不過,美股既一啲強勢股,係破完歷史新高後,仍然繼續向上升,強弱之分,非常明顯。

有人會覺得,美股升咗咁多,唔抵買,買港股好過。但我會同你講,股票唔係咁樣買。股票走勢,永遠都係強者愈強,弱者愈弱。

同埋道理,如果要造淡港股,都未必一定要玩恒生指數。

因為,恒生指數起碼都仲有得升。但例如係東亞銀行(0023),股價升都升唔起,某程度上係反映緊市場對公司前景既睇法。跌市跟跌,但升市唔跟升既股票,通常只要市況再稍為轉差,股價就好大機會要再破底。

奈何,股票期權開價唔好,否則會係造淡之選。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室