無糧又想買樓、收租又唔比稅,咁既PK諗緊乜? #1841

諗sir 你好,本人已報讀 7月 買樓001課程。但有些問題好心急想向你請教。

 

第一個問題是有關九成按揭 的收入證明問題,本人想明年年尾買樓,過往幫爸爸公司打工(現金出糧),鑑於老豆出糧比仔,就算銀行做 自動轉帳,按揭保險公司都未必會信。故此,本人想 與媽媽的朋友互相幫忙,因為佢個仔都要買樓,我爸爸幫佢個仔做自動轉帳出糧紀錄,媽媽的朋友用佢公司幫我做自動轉帳出糧紀錄,買埋MPF,不知是否可行?

 

 

第二個問題是本人想做3萬蚊薪金紀錄,但又唔想交太多稅,所以想 今年10月-下年3月開始做銀行自動轉帳出糧,共有6個月 入息證明,一方面交少d稅,另一方面又有 半年入息紀錄,不知是否可行?

 

但又怕HKMC 以入職年期太短,不知工作會否穩定為由,而拒絕借錢。如不可行,是否要做多幾個月入息紀錄?稅單如果只有半年入息,又可否向HKMC解釋 剛轉工作?

 

第三個問題是我想自己3萬薪金,加上女朋友$12800薪金,用2.59公式計算,借貸力應該是550萬。本人女朋友 也是受薪人士,薪金是 $12800(已扣MPF),但因經常要 OT 工作,有OT錢,每個月她的薪金也不是太穩定,不知會否影響我們做8成-9成按揭? 但她的糧單有寫明底薪是 $12800。另外,我和女朋友都有 9萬幾 政府學債要還,我每個月還$585,女朋友每月還$800幾,想問對借按揭有冇大影響?

 

除此之外,我聽諗sir 節目講過,借唔借到8-9成 好睇文件靚唔靚仔,請問諗sir 仲有冇文件上要多加注意?請多加指點

 

answer:

在這讀者見到有執行力,起碼有開始試及深入諗,先祝佢順利。留意整大收入不要變成假造文件,在此點亦不建議向唔收你錢而爪分你現金回贈或借貸金額既SALES/轉按公司求助,因為有心人裝你,好大機會監就你坐而錢就佢分。就當成件事借唔到,佢地nothing但銀行可以攪到好大鑊。回應讀者唔想爸爸公司出糧比自己,此為正確的。另外批六成同九成按揭之其中一個分別,係七成-九成的「二按批」很有機會將你出糧的公司查冊,但搵朋友公司出糧,你就要揸死證明講清楚你不是為求貸款去做個假聘任,免得有日你朋友要舉出你這資本家批鬥時,你無話可說。

 

明白梗有些人講話「我試過乜乜乜,最後都係批到,老諗你講既有錯。」只好說銀行點批loan很看佢點演繹金管對其批貸之指引,加上銀行文件多得只能抽樣調查,有時有些人走得甩唔出奇。另外hkmc或金管不時都會與銀行開會解釋指示,例如在信用卡借出低息現金分期,究竟是雙重借貸應計除信用額之外的另一筆新借貸? 還是當抽取部份信用額去用不計新借貸? 在2012年是分水嶺,2012年後計兩筆。計了兩筆,客人就更難靠透支信用額當首期零儲蓄上會了。

 

入息證明六個月有齊最好,但若有自動轉帳出糧,三個月都夠照。當然銀行亦要求你最少做夠六個月野才批按揭比你,如專業人仕有時三個月都信,但你如有準備就唔好試銀行個底線,做夠六個月才攪什麼買樓或轉按未遲。另外有些人又問:「當我八成上會買了間樓偷偷地出租,如租約被租客要求拎去打厘印,是否稅局即知我出租樓而要交更多稅?」先講交稅是公民本份,我地只可以說打厘印後很多人都無收到稅局追稅,所以審計處真係要睇睇此漏洞。

 

不過筆者要提提你,偷偷出租後要面對的事比厘印一件事更多,例如有日你間偷雞屋比有關當局貼紙仔係門口,話要做漏水測試,究竟點處理? 另外除了稅局都會有些機構會寄信比你,一子錯就未必返到轉頭,所以最好的解決辦法,是你用真錢去做多幾次,加上自己去應對政府部門一下,閣下自有心得。次選才是找筆者將經驗口述予你,幫你省回金錢時間。

 

最後有關不穩定薪金會否影響批九成按,答案是肯定的。不定薪者如差到糧單金額不能對照,基本上九成無望。如能對照及稅單金額MATCH,七成可守。但十成計哂多是零commission而只有底薪之輩。只於什麼八百幾蚊貸款,在買樓001後佢自會識計影響借貸力到幾多個百分比。另外有閒錢,如想穩陣可五成用債基收息,滲另五成去進取買股票為後生理財框架。至於超30歲或之40更至50歲者,有另外分配方案。

 

希望你明白筆者唔只同你吹下買樓區份、講下類型….而係實戰相授。交叉運用買股的時機、買債的方法、買樓之借貸去作理財方案,還待看倌為筆者指出除本網外之第二個。








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室