【莫家強】期權短評 – 反彈完,係咪可以造淡?

有朋友問:「反彈完,係咪可以造淡?」今日,就集中講呢樣嘢。

有睇開呢個專頁既朋友,應該都會清楚我既睇法。港股,我個人相信中線未跌完,要徹底轉跌為升,絕不容易。

但短線,我都講過,我唔會去估,因為實在變數太多。我既做法係,先用策略賺住時間值先,然後等機會出現,再決定下一步行動。如今,港股有一個唔錯既反彈出現,嚟緊就要開始睇實。

咁要睇啲咩?

1) 升既時候,成交夠唔夠?同會唔會持續增加?

成交,係有無錢重回股市既指標。如果嚟緊個市繼續升,而成交一直上漲,咁我都唔會盲目到夾硬開淡倉。不過,若今日之後既上升日子,成交好快就回跌,咁個市應該都唔升得去邊。到一啲阻力位,就可以造淡。

2) 上升股票既數目,夠唔夠多?

今日,ok既,上升股票數目話哂都有過千隻。但往後如果個市再升,會唔會仍然有咁多股票上升。

指數升,但上升股票隻數減少,就係一個大戶托沽貨既警號。大家都明,升市沽貨,中央政府會由得你。但喺大跌市中沽貨,其實內地唔係咁鍾意。所以,若見到之後指數一直升,而啲下跌股票數目不斷增加,就要好小心。

呢一刻,我自已未有太大行動。美股,賺得相當唔錯,破頂既股票,大家可以繼續揸。

港股,同上星期比,當然都睇返好少少。暫時,都係繼續收住時間值先。下一步點做,決取於以上觀察要點既結果。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室