【莫家強】期權短評 – 港股幾時會反彈?

仲有唔少投資者會問:「港股幾時會反彈?」

當然,問呢個問題,有兩種人。

第一種,係睇淡既人,等反彈造淡。我既建議係,俾少少耐性啦,港股跌咗咁多,有反彈絕對唔出奇。暫時,用住有時間值既策略賺住錢先,到機會出現,就出手啦。港股要徹底轉跌為升,唔係咁易。

第二種,係睇好既人,可能買咗貨,或想再買貨、溝貨,希望有反彈出現,可以賺少少錢,或令損失減少。

但係,大家都睇到,美股升成咁,港股都彈唔起。真係對港股有期望既人,只怕會一次又一次咁失望。

相反,美股反彈咗兩日,一啲強勢股已經返回歷史高位,甚至已經破埋頂。有睇開我節目,或者有跟住買既朋友,一定會睇到美股同港股既分別。

「啲股票升咗咁多,升咗咁耐,仲叫人買?」

久唔久,都會有人同我講類似既嘢。但我想話,如果你有呢個心態,無論你係玩港股定美股都好,都好蝕底。

一間公司,只要盈利可以持續增長,股價要升幾多、幾耐都得。呢個,亦係投資股票既本質。

真係股災,幾好既股票都要避。但正常情況下,你會見到隻股票係可以不斷上升。例如,如果你揸住隻Visa,除咗你會有錢賺之餘,其實係好輕鬆,無乜壓力。

呢個,就係揸好股可以俾到你既嘢。

世界好大,好多股票其實係完全唔會點受中美貿易戰影響。與其等中美貿易戰完結,點解唔揀返啲擺明會繼續破頂上升既股票呢。

最後少少建議。破得頂既股票,無哂沽壓,股價會更易上升。揸住呢啲股票既朋友,記住,要有耐性,繼續揸。

揀啱股,成件事會唔同。

利申:持有Visa股票。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室