【莫家強】期權短評 – 睇淡可以點做

週末期間,收到好多朋友既問題,絕大部份都係問,睇淡可以點做。

無事無幹,放假日子,大家通常都好少揾我。但揾得我,就代表大家都幾擔心港股既前景。

就我既觀察,絕大部份朋友對港股既後市,都相當缺乏信心。好多人都認為,港股後市仲會有排跌。但問題係,咁多人睇跌,而市況卻並非表現得咁差,而國指甚至已經超過一個星期無再下跌,會唔會唔應該睇得咁差呢?

我自已暫時未博反彈。

但有啲朋友,會收到我每日send 出嚟既策略回報,你哋會睇到,只要係做一啲高贏面,有時間值賺既策略,情況都ok。每隔幾日,賺既錢通常都會有所增長。暫時,喺後市走向未明朗之前,我覺得實在無必要迫自己估方向。現階段,你可以選擇暫時離場,但繼續玩既,比起每日盲目估升跌,其實有更適合既策略。

至於美股,過去幾個月既選股,大家應該睇到表現,絕大部份都唔差。點解決定完全唔玩港股,轉哂玩美股,係有原因。

個市跌咗咁多,我個人最重倉既信用咭股,由年初計起,回報仍然不俗。就算最近回落,股價同歷史高位比較,都只不過係相差4%以內。只要市況稍為回穩,股價隨時會再破頂。

而AMT,甚至可算係中美貿易戰既贏家,股票仲一直向上突破。

其他推介過既股票,好多同高位計,相差都不到10%,如第一季已經持有,今日仍有利潤。買呢啲,總好過仲揸住隻轉差咗既蘋果(AAPL)。

講到咁勁,有無股票,推介過,但要輸錢?當然,都有。

但我一直都好清楚,無人會可以做到100%命中率,但賺錢,都實在唔使百發百中。股票,一定要識得揀,但其後要做既係,贏既時候點樣賺得多啲,輸既時候點樣限制損失。

聽日有個講座,點樣揀股,贏既點做,輸既點做,都會講。有重要事做,就做重要事。有時間既,歡迎參加。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室