【莫家強】期權短評 – 維他奶、日清、Beyond Meat

近月,好多人鐘意維他奶(0345)。噚日上堂,我又講過日清(1475)。之前,又有人問過Beyond Meat (BYND)。今日,三隻股票,一齊講。

呢類公司,我會好睇重一樣嘢,就係佢哋ready-to-consume 層面既銷售,做得好唔好?

即係點?我用例子答。

維他奶,做得超好。基本上,我哋買盒維他奶,或者係檸檬茶,就已經可以即時飲用。咁樣講,好似好理所當然。但假如,佢既包裝設計得無咁好,又無附送飲管,飲落無咁方便,你會唔會買少咗?

再者,你想飲凍既維他奶,便利店已經雪凍咗俾你。冬天,你要飲暖既維他奶,佢哋又會有個暖櫃暖俾你。又有自動售賣機,又邊到都買到,即買即飲,維他奶喺ready-to-consume 層面既銷售,做得超好。呢樣嘢,幫佢哋賣多好多貨。

。。。。。。。。

日清,主打產品,係出前一丁。老實講,我早排先揾到幾包過咗期既出前一丁。大家都知,出前一丁既食用期好長,擺到過期,即係話我有好耐時間都無喺屋企煮過一丁。

但我有食即食麵,通常都係出街食。因為,出街食,有人煮埋俾你之餘,仲要有餸,或者可以叫炒丁,我自己炒得唔好食。

淨係擺喺超市賣,唔夠。有茶餐廳都幫你賣一丁,你會賣多好多。

但呢樣嘢,日清做得未夠好。起碼,好多餐廳都唔係用出前一丁,係用頂好大光麵。但假如,日清可以做到,茶餐廳唔單止用返一丁,仲要feature埋,喺餐牌大大幅圖幫你sell唔同配搭、煮法既一丁,我肯定,佢會賣多好多貨。

另一產品,杯麵,同樣道理。Ready-to-consume,即係你要有多啲地方,有夠熱既熱水,有食具,有個企位俾客人食。

我哋都做過學生。舊時讀書,放lunch,我不時都會去便利店食杯麵。

大家都明,今日,一個學生餐,平極都要30蚊。一個杯麵,加嘢飲,十幾蚊攪掂,慳返既錢,可以買自己嘢。你做到俾人ready-to-consume,賣貴少少都好,學生們都會識揀。

。。。。。。。。

Beyond Meat,有朋友話,食植物肉係大趨勢,間公司會好。唔一定囉。

無錯,食植物肉係一個差不多必然會發生既大趨勢,但就算係咁,你唔會知道,邊間公司先係呢個浪潮既最終贏家。

但今日,Beyond Meat,你放超級市場賣,sorry,我唔會買囉。除非,你能夠叫麥記幫你出個包,我就應該都會試吓。試過,唔伏,又幾好食又唔係太貴的話,我會繼續食。

Beyond Meat 公司既出路,我認為最直接,就係同國際連鎖快餐店結盟,建立好ready-to-consume層面既銷售渠道。做得到,間公司既市值,有機會上升百倍、千倍以上。

不過,咁容易咩?

你一間新公司,又未有穩定盈利,同人傾,人哋點都會offer 啲harsh terms俾你。又或者,同你簽兩年約,學哂你啲技術,起你飛腳,又得。亦可以,跟住你個樣,自己研發。甚至,唔跟你既recipe 做植物肉,完全自己研發,但做得好食過你,以國際連鎖快餐店既財力、資源,都唔似係好難既事。

Beyond Meat,的確,若然能夠成功企穩陣腳,或俾人睇中收購,股價將有潛力升到飛天。但佢成功既機會,唔係超級高。

呢隻股票,大家可以用一個買獎券既心態去買。中咗獎,升100倍以上,都唔係無可能。而且,佢既好處係,佢係一張無期限既獎券。一日間公司未certified,一日都仲有機會派彩。

講多少少。我上堂講過,有科學家話,要解決糧食問題,就要食昆蟲。

Sorry,我一定唔會食,我個仔都唔會食。但我個孫,睇嚟就走唔甩。食蟲呢樣嘢,又係差不多肯定會出現既事。之不過,靠賣食用昆蟲發達、賺最多錢既公司,今日可能都仲未成立。邊個係呢個浪潮既最終贏家,暫時,仍然係未知之數。

上Youtube,睇返Amazon老闆Jeff Bezos 1999年做既訪問,你就會更加明白我以上講既嘢。Jeff Bezos 眼光之準,同果種可以掌握、帶動未來趨勢既能力,真係唔到你唔服。所以,佢做到全球首富。

但其實,有唔少趨勢、浪潮,我哋普通人都有能力睇得到。只不過,有啲浪潮,贏家明顯啲;有啲浪潮,贏家無咁明顯,變數好多。

但我哋可以,揾一啲明顯會受惠於一啲浪潮,又有「護城河」既股票,長期持有。就係呢個原因,你應該會明白,點解我成叫人揸啲最好既信用咭公司。

唔知大家鍾唔鍾意睇我呢類既股票分析文章。鍾意既,我就寫多啲。

利申:持有Visa 股票。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

 






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室