借私人貸款去理財三個做法 #1816

諗sir您好,

 

近來收到銀行warm call,可以預批800k-1m私貸月平息0.13%apr2.9%,想用以投資部署2年後甩按保(如樓價不變,須資金1m左右),想請教諗sir是否可行?

 

以下為基本資料:

年齡38

月入48k

家庭開支20k

供樓18k (貸款餘額460萬)

月儲10k

 

市區一房自住市值600萬

現金30萬

基金股票50萬

 

私貸800k-半投資債基6-8%一半投資股票10%左右回報。2年後預計得100k,加上儲得250k,希望可在3年内甩按保。再部署5年內買第2宅收租。

冇家人助力,一生2宅是否不可實現?想希望奔四之前好好部署買第二宅養老。唯望諗sir指教!謝謝!

answer:

隨著老美吹減息,私貸又開始息平。借私貪幾傷借貸力,由於最盡只攤8年還,而樓按可攤30年,所以借私貸保守估計比樓按借同金額比傷4倍,更未考慮除本方面兩者有唔同計法。然而銀行對私貸審批較寬鬆,對於呢幾類人可考慮用私貸:

 

例一:儲蓄能力低而有理財目標急完成的人

例二:有後台而無錢買樓的人

例三:頗有錢去錦上添花加快賺錢的人

 

講例一,例如有人年到35人工30K,由於洗費頗大而加人工已見頂,月儲金額很低。那不妨利用自己薪金不錯而銀行一般願意借人工20倍(或更高)之特點,把60萬借黎然後投入債基收息,60萬收18%年息月收8千/月,而60萬如定年期還月供額應約 = (60萬+8年利息總)/96個月,即約6.2K。咁做該人可月月多儲1.8K及八年後將債基賣走,應有60萬返,變相逼自己儲錢。誠然收息101提及之債基個價會升跌、雖波幅低但都有風險,故未到諗唔到方法,都唔好用呢招。

 

當然借60萬唔一定用私貸,可用循環貸款。循環貸款只需還息就可KEEP住本金唔駛還。咁借60萬只需月供60萬*2.9%/12 = $1450,而買債基收息8K,息差8K-1.45K,月儲多成6千幾,為絕望人提供一條生路。當然都係個句: 人最好都係慳儉自己能儲錢,而只係靠呢D「借東風」方法。

 

例二: 有些人儲唔到首期,可利用老婆借私貸作首期比老公單名買樓。又或者老婆唔放心,有些銀行可允許夫婦聯名買,但只睇其中一人之信貸記錄,但最無事都係其中一人借而另一人出名買,那就可零成本上車買樓。但由於夫婦同時供樓及供私貸壓力很大,所以冇咁大個頭咪戴咁大頂帽,或一旦唔掂肯定親戚有錢救先試。誠然時下不少年青人都很精明,知道求銀行不如求老母,反正自己問題就是父母問題吧! 所以直接問父母拎首期。

 

例三: 若你工資高、已有樓、加上起碼有500萬現金或更多在手,借手上現金之1/5等值既私貸去做下投資唔算「牙煙」。那為何唔用500萬去投資,而要借? 始終有現金有安全感,加上借回來的錢要定時還,用黎投資更可戒除有些人坐死貨唔肯沽既惡集。同時借錢投資之前,必先備有良好投資戰績作為背靠。

 

另外講講為什麼有人想甩HKMC二按? 由於HKMC取用者萬一被發現將報自住樓房偷偷出租,會比銀行發現負上更大責任,所以有些人當佢500萬買樓,借了420萬上會而及後樓價升至600萬,由於做銀行一按最多六成,即借360萬。故只要當時補錢將結欠減到360萬之下就可「甩二按」而只做銀行一按,降低了風險。有些人心急就借私貸去補當時結欠與360萬當中之差額,如唔心急還下個本再等樓價升,唔補錢都甩到既。








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室