接極JOB都仲有債務纏身,點翻身? #1773

諗sir,你好,最近我在Viu TV 的買樓狂想曲及TVB兄弟幫看見你的節目(重溫節目),然後再去homelogger看你的個案文章,在下希望在往後日子不想迷惘過活,所以在下冒昧請教諗sir,希望諗sir能夠指點迷津,萬分感激。

本人46,自僱人士,太太家庭主婦,有一名小朋友就讀小學,之前創業做生意損手爛腳還有債務纏身,這兩三年努力接job,已經由原本1,000,000元的債務降至欠700,000元,但由於這幾個月不好景,負債比率又提升返了。

本人收入並不穩定,好的時候50,000元左右一個月,有時可能只得10,000-20,000元收入。

無任何物業,租樓住,因近小朋友返學,所以租金比較貴,每月租金20,000元,家庭儲備現只得40,000至50,000元元左右。

在下希望重新檢視自己理財態度,希望可以轉虧為盈,日後還可以在生活上得到改善,懇請諗sir給予意見,謝謝。

 

ANSWER:

無奈但都要講,除非讀者有神上身,否則呢世已可埋單計數。筆者咁講因認為答個案要用真說話,而唔係敷衍人。

 

當然我地唔係想睇死案主,根本唔應該亦無需睇死一個未曾面過見的人。然而大器晚成例子確實存在,但此用詞九成都係用黎安慰撈唔掂既人,淨低只10%可以逃出生天,在年近五十事業起飛。

 

讀者要留意零現金、有負債、工作辛苦但欠債只屬表徵。你要改變財務情況,最要緊係你要先改變生活習慣、對人的習慣。不少人說想富有要好努力賺錢,要月入兩萬但儲「兩萬三」咁話! 筆者樂見香港更多此等上進的人,然而把搵錢作為你工作的出發點,賺既錢同擁有既人材必然受限,做做下必然被自己的小格局限制。

 

至於筆者究竟有冇資格教人搵錢? 先講筆者的財富同誠哥比只係九牛一毛,筆者生意同成日拍我做節目既汪總比只係十分一都未必有,我地一年辛苦鋤過千萬,汪總二三十間分店一個月就返黎。至於究竟筆者個人計可以搵幾錢? 筆者在剛過去年三十晚個集兄弟幫同主持阿Bob講過,有興趣可以上myTVsuper指教下。

 

如果筆者是讀者,第一要叫返老婆出黎做野,可能讀者早年做老闆養閒左老婆,呢個就係佢自作孽,需及時撥亂反正。另外問問自己盤生意點解會失敗。失敗好正常,一場波大部份時間C朗都係入唔到波,不斷try先贏個2:0,但你要前進,必先問自己之前衰左係邊? 係太自大令partner討厭你? 係太老定每年唔開創些新業務令本身生意被competitor搶走? 係太天真比competitor利用警力去玩謝你? 係太張揚令天下圍攻你? 想清楚,可能最後有個答案適合你: 還是安穩去打工。但如果有心有力,筆者絕對支持讀者做生意東山再起。同時奉勸各位炒股票、做生意都要趁早。你見讀者46歲受到教訓,還埋債可能都50,你估真係60歲仲中年咩!?

 

靠炒股或買債基去投資賺錢快還債,筆者認為讀者唔好諗。玄學些少講: 讀者生意失敗已經無運,無運尤如烏雲蓋頂,做咩投資錯多贏少。男人要翻身,同意老婆好重要,佢呢個case老婆肯定係個key。點都好讀者肯做野唔破產唔走佬,已很不錯! 當然明白做某些生意,唔係話破左產就可以甩身的,咁做隨時甩手腳。

 

有人問趁後生應學什麼本事? 由於本文將盡只籠統答: 努力、執行力、了解他人的能力在剛踏入社會很重要,你懂了解及親和他人自己賣野都叻。到晉升管理人,培養判斷力及個人公信力很重要,各方對你有信任才有吸納賢能。而上述提到的各能力,不下功夫學不到,今日的狠心才真為下年鋪路。故想年入達起碼百萬(HKD)或創一番事業的你好作心理準備。








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室