日立金融95%按揭再作說法

在本年四月日立金融到香港成立辦事處,大搞按揭生意。搵個經絡開記者會,大推高成數按揭計劃,首三年大P減3,其後P減1.5%,賣點係借盡數價95%比你,大收買賣樓房槓桿之效,更可省回按揭保險保費。究竟呢件事有幾「筍」呢?

 

首先明白在港購房只可借至七成樓價,再要借到九成就要找來早年成立的香港按揭證券公司擔保,銀行先肯用低息借埋七成至九成那一部份比你。用香港按揭證券公司擔保要比保費,雖可加借但少則幾萬、多則十幾萬,未免令人覺得十萬銀連條毛都買唔到,所以對九成上會可避則避。

 

其實搵香港按揭證券公司不是唯一出路,你可以搵銀行借完七成,再搵個財務公司借埋七至九成那20%,你對此少為聽及,是因為財務公司息貴(可高至6-9%)而不是大部份人之選擇。當然新樓購入,不少發展商已提供埋二按財務(如新鴻基財務)令你只要肯簽就可上會的,新樓買入做二按可以獲得低息優惠,而優惠出自何處,簡直係再明白不過。

 

現在殺出個「日本仔」,因為睇淡老家日元,先將日元(YEN)換做美金(又即港幣)再借比各位尊上。就當佢一蚊息都賺你唔到,如果日元再跌佢將之前換到筆美金轉返做YEN,已經賺左當中日元對美金下跌之差額。何況借比你地港人,只係頭三年低息,第三年後收成P減1.5%,萬一P向上行幾格,佢即可用4.X%年息同你計數,已夠「和味」。

 

當然4.X%已不算太高息,老一輩成10%息都都捱過。但收息定位顯然是吸納支付首期能力少的人、或自己有原因而肯接受高些少利息的一群。筆者都收過風,佢地而家已經唔做現契加按,只做新買物業。另外自僱人仕一般不受理,有間樓係手既老闆想搵個辦法撲水,此路不行。相信用他們的定位,是一批銀行視之為次選,但又唔想借財仔既客戶。借得財仔6%息預要比,在課堂上已和各讀者交流過,你比6%息究竟對你自己有幾大鑊,而97年一眾老香港點解街外10%息都買樓,係因為他們「只摸貨、不上會」。不明白此句,問下你老爸。

 

 

那和「日本仔」打交道,有咩要注意呢? 在2003年一眾港人淪為負資產,只要你唔斷供,一般唔會要求你即時還款的(即CALL LOAN)。當然有樓有廠有公司credit-line係同一銀行,落雨要收遮機會大增。但比著你係銀行老闆,你都會吧? 把遮唔收哂都要換把細既比你。而如今你投向日立,更或財仔,基本上樓價一跌低過借款額你就要預提前還錢,咁樣做令你係跌市冇得守,等唔到他日樓市再升而修成儲蓄的一日! 市場有新參與者是好因素,但消費者也要懂得選擇啊!








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室