【潘家榮】繼續摸著石頭過河 賺錢先再加

簡短版;
– 今日個市又再升
– 加左少少貨,去到七成幾
– 今日果隻係水泥股
– 唔排除真係行緊升浪
– 繼續摸住石頭過河,賺緊錢先再加

長文:

誠哥正式退休,每一次佢出黎講野,都值得我地細嚼,因為當中好多句說話都係充滿智慧。尋日既股東會,有兩句說話我聽得特別上心:

1.  「不應該賺的錢不賺,不應該要的利益不應該要,一仙一毫所賺的錢都是正正當當。」

呢句說話好真,喺現今社會,特別喺金融市場,總會遇到好多金錢既引誘,有好多人抵受唔住既,就可能會為左錢而做啲唔係幾對大眾有利既野,例如收錢寫股票、又或者收學費而隔硬諗啲唔work既野出黎教,一輸就輸死人。無錯,咁樣係可以賺到快錢,但係咁樣唔會長遠,你諗下當你不斷推埋啲垃圾股票,又教埋啲唔得既野俾人,累到人地輸錢,而你個名又臭晒,仲會唔會有人信你?唔單止香港首富教你賺錢要正正當當,巴菲特亦都講過「It
take 20 years to build a reputation and 5 minutes to ruin it. If you
think about that, you’ll do things
differently」。無錯,呢個世界有好多叫做揾到吓錢既古惑仔,但事實上全世界做得最好、最top、受萬人景仰既果班人都係教你賺錢係要正正當當,做對人有利既事,而唔係為左錢去做害人既野。要去到全世界最top既水平,就係要咁,所以
Integrity 永遠都係最重要。我知我今時今日只要講邊隻股票買得,邊隻股票要走,即刻會有好多客戶去跟,如果我將個目光放左喺賺佣,日日都推好多隻股票去買,出出入入一定賺到好多次,但係我唔會咁做,寧願叫啲客好股不斷坐,淡市既時候又會叫佢地唔好買,因為我相信只要我真心幫啲客賺到錢,我既生意只會越黎越大,所以我絕對唔係傻,而係我將自己既眼光放左喺世界級。

2. 「最差的時間我比較小心,好的時候也不會太樂觀,預備最壞的情況出現,穩健之中不會忘記發展,發展之中不會忘記謹慎,所以不會做極端的事。」

誠哥教我地做生意要預備好最壞既情況,穩健之中發展。做投資都係一樣,我地第一件事要做既,就係好好控制風險,唔係心存僥倖搏一舖就發達,好多人不斷用好高槓桿去搏,唔會賺一次就收手,當你不斷去搏,一搏輸就無晒的話,要成功會係幾難?所以好多人都好快被人抬出場。反而,控制好風險,就算輸都唔會輸好多,而搏就搏坐大浪,長遠就會有好唔錯既利潤,其實賺錢就係咁容易。Tony
Robbins 講過:”Most people over-estimate what they can do in a year, and
under-estimate what they can do in 10 years” ,呢句說話值得大家深思。

講返個市,今日個市繼續升,成交依然唔夠,係一件好事,即係話個市一路升,散戶都唔係太敢追,可能因為之前被玩得太多,個個都選擇離場,可能正正係行單邊市既好機會,不過點都好,我地繼續摸住石頭過河去做,暫時而家啲股仲係止蝕近,今日再加多少少貨,去到七成幾。




本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室