![](https://homebloggerhk.com/wp-content/uploads/2018/05/bb.jpg)
根據維基百科:
同理心(Empathy),又叫做換位思考、神入、共情, 指站在對方立場設身處地思考的一種方式,即於人際交往過程中, 能夠體會他人的情緒和想法、理解他人的立場和感受, 並站在他人的角度思考和處理問題。主要體現在情緒自控、 換位思考、傾聽能力以及表達尊重等與情商相關的方面。
在既定的已發生的事件上,讓自己進入他人角色, 體會他人因環境背景、自身生理、心理狀態,更接近“他人” 在本位上的感受與邏輯。因為自己已體會“同樣”的經驗, 所以也就更容易理解了當事人所處狀態下的反應, 以致理解這種行為和事件的發生。就算是自己的看法與人不同時, 也能夠理解對方在心理、情緒或行為上的反應, 但能夠理解並感同身受對方的反應並不代表是認同對方的行為。
為咩事講同理心呢?
先講第一位媽媽。 幾個月前,有位媽媽打電話去分會話小朋友發燒要請假, ok冇問題,然後佢問點補堂, 根據公司規定佢呢堂已經超出補堂限額, 通常我地會睇平時同家長嘅關係, 家長態度等等而睇下俾唔俾酌情額外補堂, 而呢位家長一向態度都麻麻地,咁同事就照規矩講啦, 然後呢位媽媽開始發難,好似欠左佢咁, 老實講俾就人情唔俾就道理,佢嘅態度我就諗唔到理由要俾人情啦, 跟住佢就話”你唔俾我補堂丫嘛,好,我就照嚟上堂, 然後傳染俾全班同學,有咩後果你地要負責呀!!!”
呢幾句可以講話係恐嚇嘅說話非同小可, 分會同事即刻打俾我問點處理,我就叫同事先預備好足夠口罩, 如果佢真係嚟到就再同佢講道理, 如果堅持要入課室就全班一人一口罩,俾大家有個防備
結果佢有冇嚟到呢?我相信負責同事有能力處理,所以冇問係點, 落晒堂後冇電話到,我估應該冇問題吧
第二位媽媽,前兩日打電話嚟幫家姐問班,安排好晒預備收線, 媽媽突然講想幫細佬問埋,然後話細佬好曳, 之前上過其他playgroup走唔停又攪攪震, 覺得其他家長面口唔好睇,所以好怕再返playgroup 會影響其他人上堂,覺得會對其他家長唔住咁話
咁我就同佢講一大段”每個小朋友都一定會經歷唔同學習階段, 而每個家長都應該學習接受其他小朋友嘅差異”嘅大道理, 最後我同佢講,教養小朋友嘅重心應該在小朋友身上, 而唔係別人點睇你個仔,你有呢個心驚影響人本來係好的, 證明你會為他人設想, 但唔應該為此而抹殺左自己個仔學習進步嘅機會, 所以我建議你嘗試將對細佬教養嘅focus放返在佢身上, 而唔係在意人地點睇你地,課堂上有老師幫你,唔需要擔心太多
呢個電話講左大半粒鐘,最後媽媽話: ”真係好多謝你安慰我,我而家個心覺得舒服左好多” 我話:”我並唔係安慰你,教養小朋友應該係向住呢個方向的”, 然後媽媽話:”咁我多謝你鼓勵我……”
兩位媽媽出發點都係為左小朋友好,然而在”同理心”上各走極端, 不能否認呢個世代嘅父母學識豐富, 錯與對價值觀有自己一套演繹方法,媽媽要擔心嘅事實在太多, 凡事保持心境樂觀d,平常心d,唔需要諗太多, 呢個世界有好多人可以大家互相扶持的
母親節快樂!