40歲之前為自己同老闆贖身 #1500

 

不知不覺已出到第#1500篇文章,感謝各位收看支持。每個交易日出一篇千字文殊不容易,坊間有同類習慣的人,不是報館聘任的寫手,就係億萬富豪,淨低個班已屬界別內知名的專職寫手了。筆者知難而行主想實踐「每日一小步、成就一大步」的理念。重大的勝利由小小的進步去累積,所以想到目的地先必確保車唔好停,點都要行,但唔一定要快。呢件事筆者要以身作則,做比合作教師睇,做比下一代睇。當然每人對進步的理念不同,而筆者早年從事「低下」工作,從保險公司到銀行日日求人買野,對自己從來用「蠢人」定位。在堂上亦是教蠢而又大部份人都可實行之方法。至於比筆者叻或者識野多既人,鑑於香港至今仍是一個對分配資源對比有效的社會,呢批叻人相信已經好掂。

 

明白筆者1500篇文章要睇哂好難,往後筆者有更多方法,在專頁及網頁引導大家收看自身合用之個案,在此先勾劃不同財務狀況的人怎開始為自己的理財計劃作構思。

 

20-26歲,有錢 – 呢類朋友一係就老豆有米,或者命中註定早行運。但早行運常見有早玩完既例子,太後生通常都克服唔到有錢後的自我膨漲。後生如何有錢建議全放樓,因為年青有錢當做錯決定,買樓可令自己點都輸淨幾個籌碼。

20-26歲,冇錢 – 呢類人大把。記住後生比人呃好過老來先清袋,買下股票交下學費是必要的! 建議八成錢放(股票+ETF)而兩成放債券。買債志在趁後生認識下收息工具,買股就看看自己有冇天份,如心態好可以長期每月炒到穩定有一萬幾千既,可以再試能否加碼贏一舊錢告別打工生活,發展自己公司。如炒股不成,專心事業,能全職在股場生存的人只少數。因事業成功要睇心態,股場贏錢更要睇心態,所以事業失敗的人轉戰股場只係將你EASY LEVEL玩唔掂既GAME轉HARDEST MODE。

 

27-32歲, 有錢 – 呢類朋友如果唔靠屋企,即表示自己撈得幾掂。靠打工上位既你要向儲齊三間樓進發,因為你人工高借貸力好。靠做生意上位既要知銀行借錢比你仍不易,要對借貸文件做好修飾,及保持一定現金水平先好睇樓。打工個批可以買下股試下能否再快人一步,因用既都係老闆時間。做生意個批唔好炒股,投資落自己盤生意才是最大槓桿,最有滿足感及令人生經歷更多的。筆者不建議人做全職炒家,主因是就當炒得成功,只獲得number機前的人生。一個有錢而在對人對事都處理不好既人,人生是否快樂及有貢獻值得深思。

27-32歲,冇錢 – 呢類朋友要看看自己未來3-5年能否有再躍升可能。無既快去找尋政府資產,例如公居屋。有既就盡地一鋪博埋佢! 30歲後命運急轉彎成大器既人唔係無,但少。大器晚成既動聽故事你聽得好多次,但唔係好多個,因為佢好聽而罕有。

 

33-39歲, 有錢 – 樓房目標起碼兩間,目標為39歲之產出與自己人工7成之現金流。即係40歲之前為自己同老闆贖身。贖左身先講什麼股債分配吧! 假設你人工4萬,其實只要你整一間套房,有200萬投資債基再疊增收息每月18-20k(即年10-12%息),其實已經「到數」。呢個blog大把人勁過呢等ACHIEVEMENT,明白呢個ACHIEVEMENT好自私! 不過先說明筆者是真小人,唔會扮好人又零收費,背後曲線食佣或者收左財團marketing fee又唔話你知個隻。你先攪好自己再去幫人啦,朋友~

儲樓投資,是參與「人贏我贏,人輸我輸」,較低難度但令生活水平有保證的方案。

33-39歲, 冇錢 -此時為你最後機會想想做人是否出錯; 又或閣下甘於清茶淡飯,但老豆有病又怨公家醫院睇症太慢既時刻。當然,筆者無資格評論閣下任何行徑或習慣是否妥當。就如筆者自己有錯,社會好快會懲罰我。改下習慣,自然改到人工,自然改到存摺上數字。至於手上些少錢, 由於買樓應有困難,建議用另一打法: 「博人輸而只我贏」,難度大。即3成錢投入極高槓桿之投資物如期指期權,又或真係虛擬貨幣都可,然後希望出現植端市況而令你翻身。淨低七成錢買些債基吧,收下息,唔洗拎哂全副身家博。當然博之前要學好該項投資物之規則。

 

40-47歲, 有錢 – 最多3成錢買股,7成買債。樓房不計入股債分配,息低時盡借去擴充資產。基本上你知未來5-6年唔犯大錯,起碼可以小康而終

40-47歲, 冇錢 – 全部錢轉哂做現金,睇下全香港人幾時x街死,再all-in博盡。由於所剩時間少,必須由人輸我贏的場景才能扭轉劣勢,絕無正途可依。

*本文謹作參考,個人情況有別或令閣下不符上述區間,詳細需要閱畢閣下情況再議








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室