2018年第一個交易日，大市表現的確令人喜出望外，喺假期前見到美股年結之前跌左落去，諗住港股今日都應該無得紅盤高開，日內升得返上黎，做到紅盤高收已經好好，完全無諗過今日期指一樣可以照高開近百點，而且仲越升越有，直至呢一刻升左近六百點。如果投資者一心諗住趁放假走晒啲貨，等放完假返黎先至再買過的話，今日都唔知點算好，究竟追定唔追？所以先前我不斷同大家講，要跟策略，唔好因為自己放假就沽貨，市場係唔會等我地架。
講真，今日升咁多，自己反而一個買賣都無做過，畢竟要買既，之前都已經買晒，唔需要而家先走黎追，可能黎緊做既野，都係好悶咁睇住升就得。當然，又唔係完全無野做既，之前乜都買啲，買左好幾隻股票，黎緊要做既野就係睇下邊啲表現無咁好既，就汰弱留強，將個倉越執越靚，咁當然，我地唔係淨係睇一兩日既表現，今日唔升就即刻換黎換去，都要睇多陣既，我自己會用12月15日附近低位作為第一條分水嶺，跌穿先減一減。
爆升果啲868、2202當然唔駛理住啦，不過賭股呢幾日麻麻，今日仲曾經穿一穿位，好彩彈返少少上黎，而家再睇多陣先，如果之後跌返落去，都係減一減賭股先。
筆者為證監會持牌人，其全權委託帳戶的客戶持有信義玻璃(868)、萬科企業(2202)
