[諗sir]債基疊增。半年。賺40% #1365

諗Sir唔好意思!頭先send得快得濟未打得完整,可以不用理會剛剛的email,以這個完整為準。

 

一直有睇你對黎緊樓市嘅前境同意見,本人十分認同,個人有些問題想請教諗sir,希望可以指點迷津。

 

拜讀你既文章有一段時間,雖並非所有內容都能完全領略,但都獲益良多,希望你繼續寫更多文章,分享更多你的心得!

 

最近有一件事令我十分煩惱,想請教你,希望得到高人指點。

 

本人今年26歲,月入3萬,加上外快每月月入平均4萬左右。大概三年前以325萬買入一間樓齡大概40年的物業,現在已經將樓供完,收租每月$12000。經紀話現時樓價大約升至480萬可以賣出。

而女朋友跟本人同齡,月入連Bonus都over3萬5,都係三年前買入了一個300萬質素跟樓齡相約的單位,當時做7成按揭,月租$12000(市價大約$13000),現時還欠銀行$190萬,樓價也是升至大約480萬。

因為我跟女朋友計劃2018年底結婚,有意想買一個將來住的單位自住,因為近工作地點,有意購入奧運站帝峰皇殿2房單位,現市價大概9百萬尾至1千萬(好貴!)

我們二人現時儲蓄有大概140萬,所以資金缺乏的情況下加上手上兩個物業年齡開始大,所以打算2017年內賣出女朋友手上物業,連還款大概可說取回290萬。

加上到時候2018年中大約儲蓄可以再多110萬,理想化下,如果2018年樓價真的下跌5-8%,屆時將會有5百多萬現金打算買下帝峰皇殿的2房單位。

 

未知諗sir有何高見,希望可以指點一下小弟,萬分感激!

 

P.S. 本人對這棟物業情有獨鍾,剛起好時已經好想擁有,但當時未有能力,未知諗sir對呢個屋苑有何睇法,有無不好的地方可以跟小弟分享,因為小弟擔心比自己諗法沖昏頭腦。

 

ANSWER:

此個案、必令一眾年青人討厭。讀者3年前23歲買樓、大賺480-325 = 155萬價格。仲要而家話間樓就供完,佢人工只3萬計盡4萬,究竟開頭咁多錢邊度黎? 係咪父幹? 係咪?

 

至於佢女友,仲要話係同一時間都有買樓,呢對男女咁咪賺到high-high? 而家仲同我講一炮過買帝峰皇殿?

 

先講筆者看法是讀者過份冒進,想套錢再買大的做法就算可行都不應行。好應在26之年保存勝果再伺機而出,冒求在35之年獲得階段勝利,先完成財務自由唔使撈呢件事。

 

讀者的本錢是年青,可以等。如將兩個物業全套獲480+(480-190) = 770萬,再加手上儲蓄140萬,基本上只要係26歲至31歲呢5年將筆錢稍增70%至double,有1400萬係手只要識用基本上唔使點做。當然1400萬唔可以保足佢一世,不過31歲有過千萬現金係手好好用。若樓市在5年內有調整,過千萬現金持有人又再遇一機遇可鏟上二千,那成世仔就睇下等唔等到呢鑊了。不過樓市始終要向下,就係因佢讀者後生可以等可以博,所以本案叫佢博既方向唔係再加碼買帝峰皇殿,而係掉轉做空樓市將錢全套出。因為一旦博到就係近乎成世安逸,加上勝出的概率唔細,只要佢而家將樓賣,投入一些收息物收10-12%年,再等個樓市跌2-3成分段買。基本上易明易做。

 

可能你覺得將錢增70%好跨張,其實你比得5年時間,增70%就唔算係極難既事。有些人投資一世都係輸錢,問題在於佢唔堅定、貪快、一開頭用錯方法。近日再收到一些收息101舊同學的報捷之訊:

555

按筆者理解佢應該係前年上收息101,即2015年12月,然後去年2月入、8月走一部份,至2017年6月10日賣哂,100萬投入賺40萬,大致是用半年主力投資而擺多再近一年清埋d貸尾,賺幅40萬。賺取金額40萬是收息101學費($4840)近100倍,謝謝佢用萬分感激作回報。明白舊年市況平淡,致讀者未有何損失,亦不排除有同學第時會因跌市輸錢而咒罵本人。先提筆者在堂上花更多時間講風險、少談回報。亦講明市況不好就當你用債基收息都要輸錢的,只不過買股輸到PK既時候,買債可保大約輸1-2成。那在大跌市的時候能保7-8成財富,基本上能為日後大賺提供契機了。

 

學生在持貨當中亦沒作其他動作,當然已在課上告知判斷出入及加減碼的指標點睇。總之佢唔郁,長坐,等就係悶贏的要旨,而缺點是炒股班友一日賺一倍既時候,收息朋友只可憐地獲每月一萬幾千利息。惟當你把視野看闊一點,應明白大錢應坐大船穩著行。少錢你可以炒下股仔無問題,但絕不沉迷。回想你的子女學行,通常行不到終點唔係因為唔識行,而係佢太好奇街上事物而東搞西搞,最尾忘卻自己訂立目標之初心。今日網絡世界出現一批連爸爸都未做就教人「日搵6萬」既炒家,筆者只好講世界變。今時法國總統都係39歲就當選,再拉個六十幾歲既阿媽上台,可能筆者接受能力低,只懂找一些悶而穩的方法。

 

26歲仔對於佢什麼「好想擁有」既事,不評論。讀者應套錢再收息、等市跌。咁就可再下一仗而功成。當然要全世無憂就要修身及更高階操作之配合,但30出頭手揸過千萬CASH已屬很不俗。沽在樓無地方住可用手上資金收息,800萬收10%一年,已得80萬一年,夠租比華利山啦(香港島那個)。

 








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室