8個原因你攪唔好收息 #1354

 

 

諗Sir:

 

你好,我是LY40的學生。

 

兩夫婦一個今年40歲,未買過樓,月薪3.3萬。另一個早幾年賣了樓,現在冇樓在手,後悔莫及,年齡37歲,月入5萬,預計7年後月薪約7萬元。兩人現金股票共500萬元,每月租金約1.7萬元,每月可儲蓄約3萬元,心儀自用單位約8百萬元。

 

是否應該1人買1個物業收租以補貼租金支出? 1人已40歲,應現在立即趁借款能力高買還是等樓價下跌1成才買入? 另一人應該現在買還是等數年後收入較高才買入自用? 應該買屋苑還是舊樓呢?我們沒有人頭可借用,兩人買了1個單位後應該不捨得付15%稅再買。還是全力用債基及直債收息等待時機?

 

謝謝諗Sir

 

迷惘人上

 

ANSWER:

未有樓者,諗買左樓之後究竟比唔比15%稅買第二間,實太早。

 

早賣樓去等樓價跌呢d傻仔野,讀者用自己錢同時間去買左教訓。筆者可省下字句唔使提,而看倌有幸睇到呢個blog同上堂是緣份。

 

為什麼要買樓? 因為銀紙貶值得緊要,而資產膨漲得比工資還快。按政府統計處資料,2011-2016年香港人工資名義升幅29.5%,扣除通賬及物價升9.5%。5年夾埋升一成,此世代係香港靠打工黎保退休,行唔通。做生意可以得,係大陸打工都可能得,但係香港打工就唔會點得。當然你打工打到陳德霖咁型,成千萬一年,梗係無問題。不過你睇本BLOG不少月入十萬既人仕,佢地生活有幾「神話」?「開心」? 勞煩大哥你自己搵答案。

 

40歲讀者格局就是要重建被動收入,另減少投資組合內之不確定性。股票不能佔總資金的10%,即50萬。另外好要抽100萬作首期去買間四正屋苑樓收租,八成上會。估計月供在15K左右,而收租13-14K應可達到。那為何收租比供樓少仍要買樓呢? 因為供樓的15K,有一大部乏是供本金的,利息支出比想像的少。另外利用銀紙長貶之原理,其實供得10年,15K月供應不算什麼。相反樓的租金就可以隨通賬加減。

 

當然將八成上會的樓出租是違規的,讀者好應學好息去處理此事。當然犯法的事,偷雞的事都唔可以做。有些人亦在實行前想好下步,在被人問及為何偷偷出租時有恰當答法。

 

當佢500萬入面50萬係股票,100萬拎左去買樓,淨低350萬可預一半約160萬,利用收息101的債基疊增方案收息,一年收息約在15%。先講此方法是不保本,但債基的波幅比股票低,計過數,其實比中電仲低。160萬收15%一年,一個月有$20K收。你可能心諗係咪咁易? 如果你睇到呢個BLOG,及用對方法開始實行,就係的。不過一般人都不會接受到此等消息,原因:

  1. 金融機構根本唔想你知用債收息呢件事。他們要為生意打turnover,用股票梗係更好啦
  2. 客人安心買債收息,經紀餓死之日
  3. 買債又槓桿好煩,拉長左sales cycle,但佣又唔見高左,不如叫客買股票基金快買快turn好過
  4. 股票基金佣金在3%起錶,債就….
  5. 若客人堅持要收息,sales利用股債基金去模糊個重點,既可符合客戶要求但又令佢去唔到想去的安身之地
  6. 比一些特別的基金佢選,令客人既錢從此走唔甩,或少蝕令佢唔想搬錢走
  7. 當客人開始有息收,又說佢供保險,令原本產出的珍貴現金流歸零
  8. 最尾亦最重要一個: 筆者唔夠錢係各大媒體打廣告,令事情屬少眾知識。








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室