(上集)幫老闆做牛做馬、很想打破此格局 #1337

諗sir, 您好!

小弟有幸拜讀到您的「樓市雙租族」。當中有些個案正正就是小弟的現實寫照,小弟就是您在書中所說的「幫老闆做牛做馬、多勞少得型,年輕又幹著不為社會受落之事」,很想打破此格局,亦想跟您書中的建議改變生活習慣。

例如:原本工作10小時;改為3小時進修,2小時識朋友,5小時工作。

但小弟愚昧,還是不太明白,現有問題如下,盼能得到諗sir賜教!

1)進修,請問應先進修理財知識,工作技能,還是其他的工作技能呢?(因為眼看身旁的資深同事的月薪亦不到2萬,自知不是特別聰慧過人,相信自已繼續在這個行業工作多10年,最多亦只會跟身旁的同事差不多。)

2)識朋友,請問是識甚麼朋友,怎樣可以識到這些朋友呢?

3)加入winner-circle, 請問是甚麼意思呢?如何能夠加入呢?

請指點一下小弟的迷津,感激!謝謝!

 

ANSWER:

好啦,日日答理財個案,今日換下口味,試試談談年青人的上流方向。2014年曾撰文「成為千萬富翁的八個步驟」,時至今日,再寫一次類近的。

 

上流或可理解做增加自身優勢,例如有錢、例如有地位、例如有專業知識、例如有影響力、例如一個電話可以打比誠哥約食飯,例如有易於檢控他人,利用社會整體資源去打擊對手之能力。又或例如有家人幫助,即在不用交換利益之前題下就得到血緣親戚之幫助。這些都屬不少人想每日加強的地方,衰d去諗就加強用以滿足個人私慾,好些看法是令自己得到滿足感和快樂。當然上述不包括斷六親出家向彿之路向,筆者未諗明貪嗔癡。

 

上流的阻力

可以係你競爭對手,又或係政府,當然攪得唔好連你屋企人都會,但其實唔係你老闆。本篇文章旨在用更廣闊視野,去將連財務自由以外的發展都輙述出來。

 

有財力有某行業知識既敵人,不時會利用政府監管去打擊他人,這經常發生。所以閣下真係要行上流或「我要發達」呢條路,預備將來遇到的事比你想像中多。畢竟什麼創業分享會? 又或什麼交流會? 很多時成功例子傾向分享好野而將衰野收埋,唔通電視台會打比陶傑材子訪問佢當年係九龍塘時鐘比人映到單野? 一個編輯,可能兩萬蚊人工都無,仲少過呂志和口中既「後生仔人工四萬」標準之一半。所以揚得出黎既事,些少野學到可以,但真係要到point及緊要既,唔會有人輕易教你。

 

人從一出世就成為社會一份子,而社會受政府規管。究竟政府邊個話事由當權者決定,本文唔會探討改朝換代既事,惟政府本質就是令社會和平穩定。正所以無暴亂無炸彈,各人安安定定,林鄭又「交到數」比習總,大家又何樂而不為呢? 當然本案讀者作為個社會小卒,當然想問點變大粒佬,不過唔好心急,先要明白社會上一些規矩。政府要平民唔好事,當然緊係軟硬兼施,軟一面當然要起公屋同派糖,硬方面要搵差佬管佢地,不過香港有800萬人,而差佬只30000。咁情況三萬差佬係唔可以1管30既…所以另一個幫政府睇實班平民既人,係老闆。

 

200年前,社會上面老闆係多過打工仔

自工業革命後,機器取代人力,個體戶做生意的人大大減少。與200年前比較,今時做生意既人只佔整體約5%。但在200年前,社會上面老闆係多過打工仔。當然,舊時亦有另一階級叫「奴隸」。講返老闆點去管員工? 呢件事你而家感受緊啦! 仲使講! 總之九點返黎八點走,唔好亂係街鬧事,有咩做錯即時斷糧,故此現代社會有九成人的行為都受老闆制約了。這亦是政府很重視失業率,同埋點解明知老闆有很多地方可以避稅,政府仍願意扮睇唔到既原因。

 

當然,老闆唔係大哂,佢只係古代「千夫長」既現代版。政府一樣有方法監管老闆,同時講明員工行為要老闆負責。當然條友放工去打劫老闆梗係無事,這些大罪由警察包尾。不過一些小事故早在老闆手已拉停了,日後成大火的機率大降,同時壓抑了不少創新思維,令犯罪事故減少。你睇下Uber就係創新,挑戰緊法律。而法律實未能與時同進。那結果點做? 先殺犯例者再自己拎黎做,派個信得過既「千夫長」去睇實。科技令社會新增不少原有法例管唔住既野,惟有比更多壓力老闆暫時「用人去管住一大班人」。

 

老闆點管? 要知在香港做生意,除非規模很少,否則梗有幾項條例適用於一間公司。做飲食有監管,開學校有監管,旅行社同請菲傭很易受管,銀行、賣樓更加唔使講。老闆隨時在政府訴訟下屈服,因而將其行為盡量配合政府意願。有埋商品說明條例同MPF,基本上要玩你老闆梗有一條適用。所以將香港地產業換上紅色資本是國家戰略,不無道理。

 

係網上賣野看似不受管制。不過唔使租地方、唔使拎牌既生意太易被抄襲,所以生意一發大,自然有競爭者將其「殺掉」,根本唔使管。至於小型補習班、網上賣化粧品在政府角度無需趕絕,只要你咪咁爆自己溝樽護膚水黎賣就算。收稅次要,管好你班人為主! 這是在政府層面看的管治架構。

 

聽日返黎,講講社會上的五種人: 優異生、次者、庸材、受養者、監犯。








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室