諗sir理財係隻龜! 自認兔仔勿入 #1316

Dear 諗sir,

 

本人現年48歲,現職金融公司持牌人,月薪5萬。家庭狀況:父母,每月供養費$4,000;太太53歲為家庭主婦,有兼職每月約$2500;女兒15歲中三,打算在港升讀大學。除基本開支,可供儲蓄為$13000。

 

財政狀況:1.居屋將軍澳寶盈花園聯名已供滿560呎單位,估值綠表價為$4.5百萬;2.家庭現金1.5百萬;3.保險、外幣若干。4.MPF $400,000

 

以下有問題望諗sir指教:

1.本人打算60歲退休,希望有現值$20,000的生活水平,直至終老;

  1. 怎樣更好運用現有資產,平穩地增加現金流;

3.是否應趁樓價高套現買債基等,靜侯樓市回落,再上車,但年紀已大,不知銀行還能批按揭否。

 

ANSWER:

筆者過去幾天善用假期,回顧了一些網民對筆者所提方法之評論,另外自己亦作了些新嘗試,睇下有無一些新方法做到債基再疊增。

 

先講講有些網民,評論筆者來來去去都係個幾招,話文章睇了一排便覺無新意。明白如筆者文章予人有此感覺,筆者自己唔多唔少都有責任。不過若招式是管用的,那為何擔心「來來去去都係個幾招」? 大家來看文章是想找個實在而行得通之法,應該唔係想睇筆者日日表演唔同招數。若想要新鮮感? 睇套警匪片令自己置身於爆炸場面便夠。但對於同學辛苦儲得的血汗錢,筆者主軸仍是以債基、樓、或加ETF(optional)去處理。由2013至今確實是重覆講著,不過會因為這4年來的不同息口週期同股市升跌去解答眾讀者之疑慮。

 

另外有人提出筆者「樓+債」的方法有盲點、同時提倡「期權收息」方法話可穩定收息退休。先講筆者發覺唔少黎上堂既讀者連買正股都未攪掂,那仲要佢地攪股票期權黎收息? 太冒險了吧。其實每一方法都有盲點,筆者都無講過買樓三間就可令你一世無憂,只不過買樓收租其實較易打理。慢慢收租慢慢儲,似龜一樣咁去爬起碼一日會達到。

 

買股票看似容易,但發覺不少讀者連「經濟週期與股票行業關連」、「基本技術分析如MACD及RSI」、「普通公司法及一些削減股權、配發股份、發CB」這些基本事都未攪好,若將買正股及買期權作理財重心? 實在難作啟齒。有冇發覺你買股發唔到達,都係你操作過多提早放左自己累自己? 股市專收聰明人,筆者在blog中講的起碼與自己想法一致,就係好少買股票。就當買都係當玩,輸贏無所謂個隻。

 

讀者供滿未補價居屋唔可以加按,加上居屋於未來供應增多,將軍澳地區亦唔見好,自己意見是將居屋賣走,然後自己同太太部署未來4年每人買入一間,希望平衡52歲前搞好每人一間樓,到60歲餘歲起碼租客幫樓供了個一半,令退休有所眉目。買樓收租等供滿唔一定贏梗,不過可強迫投資人儲蓄,加上利用時間將債務貶走之好方法(你再睇睇30年前買落美孚新村一個月供幾錢? )。若果話香港樓未來將因經濟唔好而長跌? 筆者主張買樓其實係抄股神巴菲特個想法:「30年按揭是最好的投資工具」。而股神提出呢件事,在於有按揭就可長買美金下跌,而政府將來照印銀紙令硬資產長遠升值幾可肯定。反而股市或期權幾時升跌就真係好難判斷。所以炒股炒權呢樣野留比「聰明人」做。自認蠢人請follow筆者。

 

筆者生來個樣又唔係smart(有片為證),買股技巧無再深化,幸好利用火燎森兄在網上為收入所作之界定,筆者勉強可以叫高收入人仕。成功固然帶有僥倖,不過堅持才是成事的根本。理財如是,做生意如事。知道有些人在網上評論火兄,話佢舊時係商台介紹創業板股票個陣「昆人入局」,即自己先做「老鼠倉」然後利用自己影響力推高股價獲利。同意現市場實在有不少人做緊呢件事,所以大家先有咁多免費number聽,令不少人炒足成世股都唔贏。惟筆者認為火兄現作此事的機率是很低的,因為佢要既唔係錢。係股票市場來回賺一億,恐怕滿足唔到佢想要既快感。作為創業者及企業管理人╴追求的是改變自己,改變行業同世界帶來之滿足感。當然有些人選擇追求權力,走火入魔。惟兩者之共通點是佢地同時超越了賺錢的象限,所以用金錢掛帥形容火燎森,真係睇少左佢。

 

一個仲打緊工、或做緊有錢佬跑腿,仲活係賺錢象限既人,三五閒時先出篇文而用打工既視野去品評跑緊千萬計Turnover既老闆,我真係唔知點講。當然,話唔定看倌不時都有「小你老細」,這在宣洩情感是可以,但佔你太多時間就無謂。

 

好啦,都已經成年無出過咩「諗十條」去教晦人,在此隔年再提出幾條,當警醒自己一下(叫做:如何超越賺錢象限十條)

 

1.真聽明既人,更會掩飾自己既聰明

 

2.我係銀行打工個陣同上市公司主席飲茶,佢竟然多次主動斟茶比我。令我緊記唔好自大

 

3.用錢作報酬,往往是最廉宜的

 

4.討論違例泊車是否罰$450/320根本是浪費生命,真係要做大人物,你起碼要過呢一關

 

5.賺錢是首階段必須做的事,有錢之後你就有能力拒絕令你違心或唔願意做既事

 

6.做善事係好,不過多個Steve Jobs更好! 每人生活都有灰暗面,Steve都唔例外。離婚及陪唔到個女件事最影響自己及家人

 

7.要成功就預左被人白眼,每日都有大把人想推翻你落黎。人總愛看人地仆街死

 

8.貪心鬼格局細。成唔到大事

 

9.財務自由是首步,但肯定唔係最後一步

 

10.死唔信老豆生個仔出黎,真心願是想他日日朝九晚五行屍走肉咁去扮工

 

知道得罪唔少人,都係個句:「不喜請close。」至於筆者工作目標及收你錢既目的,是要重塑香港出版界經營模式,成就更多全職作者。你可以唔支持我,但請不要唔上其他人堂或連花百零蚊買本書都唔做。他日香港只剩工商、三聯,入到去全部黨書同大公,到時你要後悔太遲。筆者個陣應已離場唔玩,移民危地馬拉。








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室