^^【期權短評】莫家強期權短評 (2017/03/29)

我知有好多朋友想學玩期指,但又驚風險高,咁啱今日有人問起,而個市又無乜太多變化,好,就講吓期指點玩。由最簡單講起。

 

 

首先,我會同大家講,玩期指可以好高風險,亦都可以好穩陣,視乎你點玩。以恒指為例,有兩個注碼級別,一種叫「大期」,一種叫「細期」,大期就一點值$50,細期就一點值$10。

 

 

玩一張大期,不論買定係沽,以呢一刻既按金水平,大家要有$78,337先開到倉。一張細期既話,就要$15667。

 

 

假如我細細地玩,以現價24,427點買一張細期,$10/點,情況就好似我買咗價值$244,270既「恒生指數」。咁有幾大風險?最極端假設,期指跌到0點,咁就最多輸$244,270,唔會輸多過呢個數,唔會係無限風險。恒指跌10%,即係2,443點,期指既價值就會同步跌10%,就係咁簡單。

 

 

咁聽落又唔係好危險咁喎?點解啲人話好危險?大家可以試吓咁諗。因為,你只要出$15,667,就可以買到$244,270價值既嘢,中間既差額,係有人借俾你用黎投資。

 

 

如果有人用盡槓桿去買期指,即係只係俾6.4%既錢就開倉,其餘既都係借返黎,咁好自然地,期指跌少少,以佢既本金計就會輸好多。只要期指跌6.4%,佢就會輸足所有錢。

 

 

以呢一刻既情況,玩指最盡可以用到15.6倍槓桿。但槓桿唔一定要用到盡,你可以用1倍以下,可以用3-5倍,亦可以用12倍。而用既槓桿愈大,風險就愈高,就係咁簡單。聽日再講多啲。

 

 

風險聲明:筆者為證監會持牌人。以上內容屬筆者個人意見,不構成投資建議,並不代表本網站意見。投資者於投資前必須充分了解產品風險,自己的財務狀況及投資目標,並諮詢專業顧問。

 

【期權短評】莫家強期權短評    (2017/03/29)






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室