【股海崢嶸】潘家榮市評  (2017/02/27)

有上過我堂既學生都會知道,要喺股市賺錢,並唔係要擁有咩天兵神器、炒股必勝法,最重要係個mindset。Mindset 錯的話,俾你學到好多唔同既方法都無用,都未必賺到錢,如果Mindset啱既話,就算唔識揀股唔識睇市,嬴面都會比一般人都高,所以大家要做既,就係要調整返自己個mindset,唔再係同其他散戶諗既野一樣,而係要同股市嬴家一樣。

其中一樣野,就係未諗嬴先要諗輸。大家聽完,可能會好大反應:「唔係嘛,我買股票係想嬴唔係想輸喎。」無錯,入得場緊係希望嬴錢啦,但係你可唔可以保證每一次買賣都嬴錢先?

好多朋友買股票既時候,通常都淨係諗嬴果面,如果升到上去咩位,就可以賺到幾多錢喇,往往唔會諗輸左會點。升左上去就識食餬,但係如果跌落去呢,就唔知點算好,惟有坐多陣睇下點,諗住坐到佢嬴為止,結果變晒千年蟹貨,輸一舖就算嬴左幾多次爬格仔都無用。

我叫大家未諗嬴先要諗輸,唔代表你一諗就會輸,而係叫大家預定最壞既情況,萬一睇錯要點做,唔好容許自己犯下大錯,長遠保持輸就輸少少,嬴就嬴多多,先至係長遠賺錢之道。

今日,相信好多人仲係將個著眼點,擺喺點樣睇個市,估黎緊個市點行,就落注睇下自己眼光好唔好,其實咁樣只不過係賭搏。

我地唔係要懶醒賭方向,而係要諗定全盤策略,升又點做,跌又點做,無論遇到咩市況都做好晒準備,嬴面自然高好多。

三月份既好淡分界線喺24000,呢一刻相當關鍵,如果今日臨收市前三月期指喺23990之下,我會平左呢一轉喺23100揸上黎既牛仔。







本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室