14k庸才點買三間樓 ? #1285

諗SIR 你好,

 

最近都有睇開你的YOUTUBE 片段,希望可以為自己未來財務自由之路盡早部署好,想向大師請教一下。

 

本人現27歲,未婚,現女友收入也不高,與家人同住,早在2011年左右用十幾萬買了元朗的一個單位,近YOHO則邊的好順利大廈,買入時155萬,借8成半,當時H按1.9厘,分30年,母親作擔保,月供約4600~4900,出租9500,欠109萬還供款,現月薪只有一份14700的文職工作,AUTO PAY 有雙糧及花紅。

家用約,交通,差餉地租,生活等加起約9000。

另供儲蓄保險1700,15年,基金1200,15年。

股票約3萬,現金約10萬。

之前玩股票都輸過幾萬蚊,現在很迷茫,除了要爭氣搵多點收入外,都有心想學好投資技巧。有睇呀SIR你講果D例子月入都係幾萬蚊以上,在下作為一個庸才,都希望得到一點建議,是否都應該再按現有的樓?用作債基投資或者是怎麼的方法達至多2層樓作被動收入??目標和前路應該點行?

 

麻煩大師諗SIR,謝謝你寶貴的時間

 

Thanks and regards,

不學巫術的吊命庸才上

 

answer:

都係個句:「改變你每日習慣、收入自然會唔同。」

 

攪什麼「搵一萬儲萬四」個類,唔能夠講無用,至少呢類人是執行力好加上有恆心。不過咁做落去只會令「勞碌」、「縮骨」此兩詞伴隨身。人生在世為體驗、為見識。

 

培養好個人良好習慣做對親人同社會都有益既事,機會自然多收入自會增。錢唔需要刻意咁每日搵,而係做好自己即有錢埋身。

 

讀者2011年買左間元朗好順意,今日都叫價成300萬,6年間賺左150萬。對比起佢自己將股票炒呀炒,各位認為邊個投資方法好D?

 

筆者認為買樓致勝不在捕捉時機,而係焗人坐貨。時機唔係咁易去捕、但蠢蠢地每日等時間過就係人都做到。買樓就係先舉債再利用時間將債貶掉、更獲租務回報同通賬齊升既保障。咁好既報酬就係考你有冇時間去等。

 

筆者個人認為,炒賣股票既傷神、而炒贏股票更需打敗市場上大部份人,此事比你要在公司爭取表現升職仲難。

 

當然唔係唔好買股。不過只投入少量資金捕捉爆發力足夠的股份就可以了。

 

「爭氣」呢件事好緊要,為不少人起步時獲得起動力之源頭。有禮貌,勤做工,可保你小富。當然不少人達到某個成就,就唔會為啖氣而過活,會向自己喜愛的人生目標而進發。

 

讀者供緊的儲蓄保無用的,已在堂上解釋,唔得閒到課可自己想辦法做好些處理佢。

 

看讀者case,有感老媽很偉大。細個唔講,今時大個仔想成家,又係阿媽指條好路救番佢。若想成就三宅(即比而家多兩層樓),可將好順利轉用途為出租,租好簽約加適合證明,租出$9.5k,70%當作核實收入,提供借貸力比佢買第二間樓用。令佢個人借貸力由原本1.47*50%*2.59 = 1.9mil提升至(2.13*50%*2.59) = 2.8mil。由於好順利已供淨109萬,建議拆番阿媽個擔保出黎,第時買第二間樓先重用阿媽去擔保。那讀者借貸力用淨2.8-1.09 = 約170萬。

 

若阿媽無樓,不妨第二間樓用阿媽名而自己掉轉擔保阿媽,即可八成上會又計計哂母子兩人借貸力。若阿媽有10-12k人工,母子兩人共借貸力樂觀在300萬之上,那只消儲到60萬首期,入手300萬樓收租絕有可能。當然讀者自己加到人工,或識將借貸力由無變有之法,都可將自己借貸力由170萬提升。點都好,後生仔一個月搵14.7k絕不合格,想成為一個被尊敬既人,唔該努力,咪再打機。亦唔好再用香港入息中位數係15k呢d說話同人講自己唔差。而人必先要滿足起居飲食,才能向更高目標進發,故人生在世不應為錢勞碌只屬空談,餓的時候你肚皮最誠實。

 

唔好睇咁多筆者既youtube,轉睇文字。另外咩書都睇下,睇書除了豐富知識,可培養一個人耐性、安靜集中的能力。筆者自己都知拍咁多youtube片其實係幫唔到手去搵高質素之付費學生的。時常需視覺刺激既人很可能是腦部缺乏模擬思考之能力,若看倌認為筆者有錯即管close browser唔好再睇。

 

第三間樓,若入息同儲蓄無大進展,要靠第時老婆幫手九成上會先可買到。若第時老婆入息有萬幾銀而自己人工又生性會添d,要拎10%即儲幾十萬應可達成,要第三間樓只要識用盡手上每人名加借貸力其實唔難。各位後生仔唔好浪費光陰,上流同擁有資產,細心睇其實可以達到。當然目標唔可以一開波就太古城,由舊區一些單幢樓慢慢upgrade,絕對計得出做得到。







本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室