論香港投資物的五個特色 #1279

諗 sir你好,



最近有幸拜讀你的Blog, 有如當頭棒喝, 實在獲益良多!  已經報讀收息101, 唯仍未上堂已心急問問題, 盼望賜教.

本人28歲, 於金融機構工作, 月入58k, 於未來數年有上升空間。 未婚妻月入不定, 平均約25k, 展望未來應大致不變.  

本人持有一個自住物業, 於早2年買入, 剛過罰息期, 向銀行估價後得悉可套出約100 萬。 由於要籌備結婚, 手上現金不多。未婚妻並未持有物業。

請問諗Sir 覺得如何能夠善用套出的約100 萬? 本人自己眼見的選擇似乎有幾個:
1. 用未婚妻名加本人擔保再買一個400萬以下的單位收租. 雖然亦希望一步步達到一生三宅的目標, 但有感樓市未來方向不明朗. 現在是買樓收租的好時機嗎? 如是, 買邊區好? 土瓜灣/紅磡一帶有作為嗎?
2. 買入債基
3. 買入直債
4. 其他地區如日本的單位收租

另外, 本人父母亦有一個約600萬己供滿的單位, 收租約14K/月.  此處亦可能有操作空間. 請問諗SIR有什麼建議嗎?


先行謝謝!

 

answer:

籌備結婚唔代表結左,儲錢少不應用此作理由。讀者在事業上撈得唔錯,惟在理財路上我們主計淨到幾多,而唔係賺到幾多。筆者過去1200個案,不少是月入過十萬無儲錢無生仔,人到四十空悔恨的例子,讀者應引此為戒。

 

不養成儲蓄習慣,學懂收息101的招式也徒然。錢好比武林高手的內力,若像讀者打算靠加按獲取投資金額,那只屬食人蔘谷精力既方法,藥力一過瞬時露底,亦唔鼓勵係招式耍好前將全副內力輸出,故建議中軸是先加按但將錢小小咁試投資當試招。至於未成家就打算老父的物業,有如使出吸星大法,吸吮對手內力。28歲年青俠士是否已將招式用熟而咪浪費老豆心血? 筆者只好說世上無段譽這般的人物,只練兩招又有奇遇,最後因得掌門功力而獨步天下,恐怕只係天龍八部小說先搵得到。

 

為答謝看倌抽時看文,我們先空談欲將招式發揮得淋漓盡致的條件:

 

直債好比降龍十八掌。簡單唔花巧,主打內力厚。好比直債基本上隔時定收息同埋到期保本已是肯定,回報亦是買入之前已鎖定,惟要有錢人先可耍得到。

 

股票好比九陰白骨爪,呢招根據小說,係比漢人萬一遇到元軍壓境,一個速成練武抗敵而唔使花時儲內力之法門。出招之時充滿邪氣,好比股票本身為「無物」,贏錢要訣就係你認為市場人仕對公司前景之概念,究竟是上行定下行中? 叫得做爪,出手必定要快恨準,無內力亦即無錢既人,只要睇得準,仍可賺大錢。

 

買日本樓屬兩儀劍法,顧名思義,係要兩個人先耍到個威力出黎。兩人指香港的投資人出錢買日本樓,而同時搵到日本有人肯幫你照顧租客同埋融資,件事先會成功。由於兩儀生四象,四象生八卦,單一邊既招式已有六十四招,兩個人加埋仲煩。正如買日本樓要對收租有心得、日本經濟情況有心得、匯率有心得,初心者不宜上手。

 

買樓屬北冥神功,北冥神功又分吸星大法同化功大法。意指業主同時向租客使出吸星大法,每月吸納租金。同時業主向銀主(行)使出化功大法,由於每月供款多屬定額,故時間一過業主只會越供越輕鬆,變相將債務化掉,等於將銀主原本擁有之債務化走。但使用人需留意如吸納內力過多,有機會出現內力反噬,七孔流血而亡。亦即係你唔計借貸力靠濫借買樓致富,萬一遇上跌市會死得好慘。

 

債基是吸星大法,亦即是北冥神功的前半部。靠問銀行借去增強內力而賺取息差,但由於收取利息是固定的,所以缺點是40歲做好債基收兩萬一個月,到50歲都係兩萬,但出面物價就貴哂。所以建議同學可由吸星大法開始,但最終如要財務自由,獨步天下,務必將全套北冥神功學齊!

 

讀者的借貸力為(58k+25k)/10000*2.59*50% = 1千零70萬。自住樓的借貸不詳,假設借了400萬,那讀者再買下間樓,借貸力不應用超70%,亦即只建議借1070*70%-400 = 約300萬。至於是否買樓時機? 用番筆者既心法,就係買頭兩間樓只要借貸力不用超70%,唔使睇市即可買入。更何況筆者只能預測大市,但世上無人能說準大市。再一次同各位講戒除睇市買自用樓的諗法。亦即係你買廁紙,係唔係會等到最底價就買? 一些自用的必需品例如人生首兩間樓房,一自住一出租賺養老金,只消有能力就買入,你忍住唔便便只會谷壞自己身體。

 

留意,筆者係為應否買廁紙而討論。至於司長決定左買廁紙,但選擇與眾不同的方式去執行,那是另一問題。請由理財版揭返去港聞版。

 

至於業主買到第三間樓多屬投資,睇市入是正常的。另外邊區好就唔係呢度講啦,各位可以買多對鞋落18區遂區搵,加上入政府統計處搵數據。亦可選擇參加本星期六開始的買樓003課程,leaverage on 阿sir既時間。拉下下方過埋收息101就有003簡介。








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室