令生活富足的四度理財防火牆 #1230

本人會員編號7058 已經報名收息101, 收息103, 買樓001,買樓003課程及己補購買諗sir 所有出書。希望在投資方面得到啟發!亦希望老師幫忙指點一下現在情況!

本人自幼就想自己創業當老闆,因為工字不出頭,經過多年努力及付出,現在生意算比較稳定。

亦因為之前一心做生意,忽略了幾個黃金置業機會,後悔不已!

本人37歲,月入75000,自己做生意 太太33,全職太太照顧兒女,現有2仔1女!家中父母聯名持有長沙灣唐樓一間及嘉湖山荘3房

每月開支3萬左右,可儲4萬。

本人及太太沒樓在手,現金100萬,叧加HSBC JADE insurance USD140000,應該是可以抵押的保險

公司每年經過多年努力,今年開始平穩發展,每月純利50萬左右,太太的工資亦可安排由公司支付,家庭現租長實丰汇,亦申報由本人公司開支!公司是本人百分百持股,但考量分享股權給一路跟著我的高管。

本人的抗壓能力及心態不錯,可以接受較高風險投資。亦準備明年初買房分拆套房出租及債基收息,希望諗sir 提㸃短期,中期及長期的投資方向,不勝感激!

心急的小老闆 kelvin

 

ANSWER:

除非你錢進的情況如豬籠入水,否則搵錢之餘不要忘卻理財。有得入水之情況,通常錢唔係用自己手搵返黎,係成街人夾硬塞入黎。總之讀者最需要係幫自己setup財務防火牆,總括為四道牆,有齊生活保證悏意。

  • 一般打工仔比做老闆的多了第一重防護,就是每月由老闆承諾提供工資收入,除非被炒。
  • 第二度為發展個人潛能,不一定是硬知識,性格同聲譽更為重要。此點重要在個人特質,無可能被騙走,惟有樓都有可以被人呃走
  • 第三度防火牆是利用資產產出相等於每月支出的收入。
  • 最後第四度為於海外產出被動收入,拓建第二個資產儲存中心及好作避稅

 

小老闆相比不少庸碌打工仔為香港貢獻不少,制造就業之餘更努力制造人口,有三子女。儲蓄率亦超50%,放棄打工月月有糧出成為老闆搵得更多! 當然老闆唔易做,每月負擔全部同事人工加租金唔係容易捱。由今年開始相信踏入回報期,33歲有盤生意達淨利50萬很不錯,起碼筆者記得當年自己淨利都未到呢個數。

 

先講讀者買落的JADE iNSURANCE係一個唔錯既計劃,回報應年有5-6%,已比該銀行賣的其他保險已算不俗。不過要留意近年獅子賣的JADE已不同往年賣的JADE。而家賣的「新版」回報係比舊版差的。筆者往時在該機構服務,曾經賣個一個3供8既PLAN(即供3年而年期共8年),8年間回報增約33%,好鬼好賣。如年供10萬供3年,一到8年年期攞返40萬。可惜做起左之後,該機構將呢個PLAN revamp(但用番同一個名),新回報是供足8年,保證金額仲少過原來的總供款! 唔少客原本舊PLAN到期唔知情仲續左新一個! 大家在設立防火牆的同時,留意不少人會合法地將你辛苦賺得的血汗錢攞走。

 

做生意人更要緊張防火牆,因為無打工仔保證收入,食粥食飯全睇自己潛能。不少老闆賺過一浸,三五七年後又將自己早期所得推翻落去救盤生意,最尾一無所得。買樓好處是鎖死自己所賺更有租收,當你有2-3個租客交租比你,老闆做決定時亦無咁易「諗埋一邊」,變相在投資及生意都同得益。讀者需先搞清佢所講的75k月入,是否銀行承認的核實收入。先講有交稅及公司報ir56a/b是必需,不建議用股息形式出比自己將稅務責任留係公司。股息出比老闆令銀行批核覺得煩,千祈唔好做令銀行覺得你煩既野,因為今次係你求佢而唔係佢求你。

 

用公司名義借錢亦不用考慮,因要用公司名買樓,加上公司名只借50%,及不時銀行最尾都叫你加個人擔保。太太全職主婦亦有用得著既地方,其實用買樓003之法太太的借貸力亦可合規造出來。當太太他日人工25k而先生做妥文件,家庭借貸力為100000/10000*50%*2.59 = 1千3百萬,令往後買樓路十分易行。不太鼓勵讀者買股票,專心做好自己生意就好了。相反打工仔就可運用老闆時間買股票,開拓除工資外的收入。讀者現時現金水平一般,只100萬。希望從今年開始得每月純利50萬,可助讀者儲蓄金額能升快一點。建議讀者樓是夫婦每人一間於未來3-4年入手,亦可攪劏房然後將收取高租金去補貼自己租新樓支出。總之買舊樓收租然後補貼自己租新樓最爽!

 

淨低現金可作債基套餐C投資,年收15%利息、另一部份投入ETF,可以石油類加科技類的。筆者估計未來1年石油價格可大翻生,而科技股同石油股在美國的表現關連性不高,可利用ETF課選擇些10-12%年息的,當做債基以外分散收息的投資。做好第三度防火牆,慢慢再諗點去攪第四度牆未遲。








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室