帶著矛盾去理財 #1206

 

諗sir你好,本人廿五歲,女,專業人士收入穩定,自己租住,無樓無車無儲蓄無家底,剛加薪至47k,月儲15-20k,唔想儲蓄斎放銀行。

小妹工作繁忙,對投資產品不熟悉又無時間研究,所以希望保本投資,不綁死超過5年。

目標先儲本金,三十歲前儲500k上車。

 

有以下想法:

1) 自己分批買入股票(盈富基金/港交所/其他穩健股票)or 債券

2) 銀行月供基金 / 債券

3) 保險公司儲蓄計劃

4) 先努力儲500k 唔好搞咁多野

謝謝

無理財智慧的人

 

ANSWER:

專業人仕四萬七,做足30年野同時假設最終薪酬為現在3倍,究竟儲到幾多錢? 55歲月入$151,000,由25至55工資均在$99000。計30年間皆可將收入50%儲起,期間可儲~$49500*30*12 = 1780萬。若55歲退休後有廿五年要活,每月有59K可以用。聽落好似好好。惟過去33年通賬令銀紙購買力縮至1/4,即今日10000元,只能買到1983年只消用$2500就可入手的物品。若讀者一心只保本期望打工儲蓄夠捱至55年後的80歲,敢講99.5%既打工仔無可能做到。做生意利潤每月一球球咁賺、或者有機會成事,惟此案不屬讀者。

 

故讀者既想保本、又想投資回報跑嬴政府印銀紙的速度,此兩事幾近矛盾。筆者予任何意見之前,必須為案主糾正方向。另一個有此想法的可能,就是發問者是個不求付出而又自私的人。若真如此就不需理財,因就算佢有錢都唔見會開心,對此等人仕筆者無能為力。

 

股票係唔會有穩健的。你夾錢同人做生意,係唔係諗住錢一定攞得返? 基金只是一個窩囊,可以載住股票、或債券、或不同類型之物品。所以基金本身無話穩唔穩陣,係睇入面載住D乜。至於保險公司係有保本而又回報年超10%的計劃,但若不知此等安排會否因加息或匯率波動而影響所冒風險,投資人買入後容易因新聞一個報導而令自己不再堅持,最尾提早cut plan咪又係輸。所以理財最緊要知目標,而唔係選產品。產品只係用黎配合不同目標的。

 

打工要利用工餘時機學習投資幾可肯定,因為打工:

1: 人工唔高。就當做特首,好肯定佢唔係貪個三四十萬月薪

2: 工作要重複而乏味。因為老闆請得個人黎返工,工作範圍一定是交待到,即係有workflow的。有得workflow即係重覆,所以打工仔成日話返工悶,根本係必然。想有趣一定係做生意,不過風險及多變性唔係人人受得起

 

年青人學投資,建議由美股開始,因為:

1:美股市場種類繁多、有助投資人招闊投資視野

2: 有助學習宏觀市場分析

3: 美股可以逐一股買,入場幾蚊美金都可以

可能你心諗:「投資賺錢最緊要、做乜搞到咁複雜!?」意見是如視野不夠廣,連睇份經濟日報都感吃力的,咁真係送埋個波去你面前,你都射唔入籠賺唔到錢。








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室