審視借貸能力 再賣居屋未遲 (答)

->>按此看問題

 

答:

相信社會上正增加德仔一類既個案,賣左居屋後套番舊錢「吊吊fing」。當然私樓市場早年已發現同樣事情,政府正「幫忙」將此情況蔓延至居屋市場。 

但居屋住戶同私樓業主不一樣,畢竟佢地大多數係實力較低既市場參與者,賣左居屋等於除左防護網,請各居屋業主係賣樓前再三思。要考慮既因素顯然為一賺左舊錢夠唔夠再買樓:買樓後供唔供得起。 

德仔個案係將自住樓(亦都係唯一間樓)賣出,咁做等於同市場對睹市升定跌,如果未來幾年樓市平均年跌5%,德仔可以打和,要每年樓跌多過5%德仔先可完成高位沽出,幾年後低吸自住樓既策略。 

5%係租樓洗費,原因為租金每年約樓價的4%,加上第時再買樓既洗費,加埋都要預5%一年。而德仔係賣出居屋套到既1.30mil,夠佢租11-12年樓。可惜放棄居屋要等兩年真空期(冇物業),用白表仲要抽中先可重返居屋市場,而新特首就想提議每年抽多五千個額。 

 

你可能問點解仲成日提居屋呢? 如果德仔用哂130做首期買間私樓自住原可七成上會,而樓價可達400萬,因400萬樓要用120萬做首期。淨返280萬問銀行借就算批到分25年還每月都要$12000蚊,已超德仔月入一半。退一步睇間樓售價2.0m,比60萬首期上會,借1.4mil分25年還德仔剛好夠上會,每月還款只需約$6000。不過講到呢度你都明,咁辛苦住係間$2.0mil既屋仔入面又何苦呢? 用$2.0mil去買間大D既唐樓又分唔到25年咁耐還。 

仲有,假設德仔買左層2.0mil自住,因供款已佔人工既一半,就算再睇中第間樓都唔可以用淨低60萬買多間上會,失去倍大效果,進而斷絕左搵個租客幫佢增加被動收入呢條路,相信居屋業主群內有此情況大有人在。總括而言德仔認係庸才而知道要搵人幫確實好,而銀行只幫借貸能力高既人,淨低既就要搵政府幫手,呢個亦都係政府定落房屋政策所塑造出既遊戲規則。 德仔賣樓為自己準備左cash但係收入有限令借貸能力跟唔上。

如果我係德仔,我會搵間銀行開個保險箱,係櫃面A提五十萬cash出黎,係隔離櫃面B買入實金再放入保險箱。咁做既目的當然係想「妥善收埋」自己資產,用呢兩年租樓當過冷河然後再用白表申請居屋,符合資產低於五十幾萬同兩年冇做業主既資格(三人家庭入息限額$27000)。兩年過後,如果樓市跌左就恭喜你,可以諗下買私樓或抽中左就買居屋。但德仔既購買力冇變,佢都係最盡買到價值二百萬既樓,而呢個價錢既私樓有幾大同就算樓市點跌,相信德仔心中有數可以買到咩野。所以置業還是政府好,係樓市較淡淨時二百幾萬而唔使補地價都夠買間三房。 

寄語所有居屋業主,當你賣樓賺一百幾十萬後你就要投入私樓市場,要有相對既人工同青春先可叫到銀行借夠錢比你上會。如住居屋既十幾年之間人工未有躍進者更多須考慮。當然你可以等樓價跌再買,不過以而家九龍兩房都要成四百萬黎計,你真係諗住昇悅居兩房跌到二百萬你先再入市? 恐怕係等呢段時間,已將賣居屋賺到既錢洗哂了! 

 






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室