->>按此看問題
煩惱人主要係煩樓上個FK鄰居。大家買樓租樓要盡量避免。屋企係一個休養生息既地方，如果返到屋企仲要去同鄰居PK，你整體運勢好極有限。所以睇樓要睇埋走廊，睇下鄰居有冇以八卦刀劍亙向，如果你係出劍既一個，諗樣勸你都係還劍入劍鞘。另外寵物真係因人而異，如果你喜歡聞狗味，同一個養幾隻狗狗既鄰居住有好處，話唔定可以搵佢幫手放狗。
先睇你地現時總借貸力，以家庭月入$85000計，減去現時A單位月供7300及供B單位，估計$5500，剩餘仲可借3.61*2.65mil=九百五十萬。你自住A有公司津貼但一樣要計落借貸比率。照咁睇你確實可加貨，只要攪哂咁多野後你每月供款不超過你家庭月入25%即可!(即$22500)。原因係當你現時「持貨量」等於25%，升市你又開心，跌市相對都開心。咁講係因冇人想蝕錢，有樓係手絕對想個市升到你死為止! 但如市跌你又有子彈入貨既話，咁跌市都唔係點怕。
當然有人話對於借貸力既估計，即每月供一萬即可借走2.65mil既說法，係假設息口唔上升同樣家庭收入不變(即係淡市唔會失業)，可以係逆市好唔同(絕對係財爺口吻)。上文已提及理財係因人而異，每個case答案都會唔同，如果你做平民飯盒生意係經濟下滑時生意會更好添! 所以另建議大家留個buffer位比自己，就係而家盡量用少D手上現金去買樓，同埋盡量「有套即用」! 即係有得套現就先套，只要套完唔好令自己負擔比率過25-30%。
綜合上述睇法，請將自住A賣走賺錢，將B套現，買入C，但C單位最好唔好貴過4.50mil。賣A係因為A根本唔值市場估價，原因係你(業主)知得比街外人更多，即附近有個麻煩鄰居，如佢地騎呢起上黎你keep間樓落去隨時出事。如租左出去恐怕租客都會成日問侯你，做咩搵野黎煩呢?
當然住開有感情，其實唔建議係而家換大樓，不過你有能力所以換到4.5mil都好穩當。比諗樣就會買返間差唔多大，或索性租樓。因為你有$7300每月津貼，假設你租一間$13000蚊既屋你每月都係比多六千蚊，但係你一買屋C你要比七萬蚊印花稅，另外要比人綁三年。今日先講一半，下回分解。