->>按此到討論區發問
現時香港樓價高企，對年青人黎講買樓已是人生一大疑難。近日青衣綠悠雅苑接受申請，排隊既竟然「阿媽多過仔!?」。可憐天下父母心，一生「兒女債」到自己退休都還不掉。仔女細個時為佢地報入讀名校費煞苦心，仲要為名校搬入該區，對仔女長大後，又要擔心其住屋問題。講到苦過「苦明」咁，究竟煩惱係「父母自尋」，定係仔女落order叫父母睇樓呢?
筆者有同事對仔女緊張非常，未到小一已經同佢報不同興趣班，佢報興趣班既選擇源於自我喜好，如同事年少時覺得拉小提琴既人好型，佢就諗都唔諗拉左自己個仔去「拉琴」。夾硬將自己既興趣塞落個仔度，個仔冇呢方面talent而頂硬上之下，而家佢係學校上親音樂堂都喊，我真係唔知呢個「童年音樂陰影」會否影響佢長大後之行為及品行。另一位好些少，佢唔攪個女，改為攪自己。為左報讀心儀天主教學校，同事為入校幫仔女加分而信教! 我都聽過不少人用此方法，乜教好仔女除左要佢一定入呢間你鐘意既學校，冇其他方法嗎?
仔女收到既order，真係遠至十幾廿年。有人覺得政務官係鐵飯碗，薪高糧準，所以係平時和仔女對話中已不斷叫個仔大個左要做AO，又或者律師都好! 父母同仔女做咁多野，絕大部份都會話係為仔女好而去做，但想深一層，當中有冇野係為乎合自己主觀願望而去做既呢? 細過報讀playgroup已經用左十幾廿萬(幾肯定! 其實大學應該做個父母於幼兒學習支出金額調查好過做咩民望民調)，大個又豈個在乎幾十萬買樓首期。當然唔係個個父母咁充裕，小朋友有時係人有(興趣班)佢冇既時候，確實會造成自卑心態。不過人地貴價去學高階鋼琴，你去平學游水亦是可以的! 父母有冇自己時間出黎陪仔女，教育正確人生觀才是最重要。
講返買樓，bank of mother一發功，後生仔即刻有樓係手，如果早幾年前買落而家都賺成一百幾十萬，令冇樓係手或冇父母幫手者更怨恨。但筆者間時有收看頭條專欄，看其中個案有父母幫仔女係2003年沙士比首期買樓，攪到變左負資產最尾返黎怪父母，所以冇論買樓定興趣班，認清係仔女自己意願同需要係最要緊的!
如樓市續膨脹，有樓同冇樓係手者在社會出現更明顯分化無可避免。看來政府傾斜為年青人在機場附近提供職業及宿舍，解決社會問題更為東涌加上新跑道發展加把力，此乃一石二鳥之策。政府更需在民怨未爆煲前及早落藥。至於幸運得父母資助者，請勿長依父蔭。今天看蘋果講少年pi的奇幻漂流，導演李安曾搵在海上漂流76日既steven做顧問。佢靠自己係海上捱足76日，雙手由笨拙變為識得一手捉起條魚，眼睛不斷觀察四周求生。最後他獲救時體重少了1/3，但全身就好似reborn一樣，睇到既顏色更鮮，嗅到的呢更濃。在這分秒必爭的香港，你想靠自己身家去照住個仔成世，定係等佢捱下去知道自己捉魚比自己食有幾快樂呢?