投資致勝十點#1098

諗SIR,

 

你好, 本人37歲, 月入2萬, 因驚樓價再跌, 故剛底價賣出私樓, 之後新的樓會成交已回升不少, 後悔莫及,

套回約2百多萬, 見諗SIR你以往解答中,

本人有兩個想多D了解及有興趣既投資方案:

 

1: 有提五年Double保險方案行夠八年回報提升至177%是什麼? 風險又是什麼?

怎樣買?

2.用債基方案, 買入收取達15%息是否指債券基金?  如是又指邊間基金公司出?

同邊隻?  風險又是什麼?

 

另外我現考慮買內房債, 但請問要睇佢既負債, 究意應看他哪個項, 如1 總負債/股東權益 , 2. 還是總債項/資本運用(%),

3. 還是長期債項/股東權益(%) 呢?

 

另外我睇緊404新昌為首選, 但見王英偉走了, 而公司之前又買左d 劣質房產作投資, 同新由大陸股東, 此乎有d不安全, 但又見佢本業香港建築有百幾億訂單, 可作幾年, 但又見見佢負債不高, 2018, 或2019年到期有近10%年息, 你意見可買入其債嗎?, 另次選  272, 1813, 1918, 2007, 3383,

 

希望諗Sir抽出寶貴時間詳細解答本人

Answer:

 

快答,十點。

 

  1. 人最錯就係過份相信自己,亂估升市同撈底。呢個錯誤,就當比你最底位撈到債基都無用、升兩下又話到頂要放走。應該少部份錢作估計性投資、大部份錢隨年紀上升多收息。
  2. 兩間樓一間自住,另一間用黎收租過世,是最基本配搭亦不應放棄。若然各位手持3個或更多物業、可考慮減磅。其他情況多屬不宜。
  3. 新昌營造超220億負債、利潤少於30億。負債與盈利比率太高。所以對讀者來文講「佢負債不高」呢句不敢苟同。
  4. 新昌唔係全部房產都劣質的,詳見年報。上披露易見到2016年5月10日有最新一份。
  5. 有關5年DOUBLE保險,坊間很少金融機構會講。因為此計劃對買家好,而經紀傭金低。其實呢個BLOG應有不少富經驗的經紀收看、為何沒人走出黎話佢識而又幫大家做呢? 因為咁做等於自己白造、既然無利益、筆者又何苦要求人幫你。
  6. 債基方案不等同債券基金。如你要買債券基金,好似筆者舊時仲係銀行做、一定會選高波幅而又低利息既基金比你。因為一旦你一開始就做到最好既方案、又何來下一次叫你轉下佢改善一下,等我幫銀行賺多次傭金呢? 跑埋條數呢?
  7. 至於筆者如在銀行招呼客人、點解要比高波幅既基金個客? 因為波幅唔夠高,客人賺錢機會細。那客人賺唔到錢、係唔會放走原本個隻基金再同私買下一轉比我賺傭的。個利益關係就在於此。
  8. 承上點,那你可能想:「高波幅基金一定升架咩? 若果跌點算!?」其實風險客戶自理。如果你真係有花時間去諗點算,即係同諗sir一樣咁天真。不妨一齊重返校園,拍住砌積木同食茶點。
  9. 如果你認定銀行同你投資死很緊、轉移買股票投資。這好比從小偷手上溜走、投靠屋外手揸AK47既劫匪。
  10. 所以有人同你做事之前,先諗諗個利益關係。眼前個大哥點解要幫你先? 識咁諗、有機會好似諗sir咁做個平凡人。唔識咁諗,生活苦都係自己攞黎。
  11. 香港有股票經紀、地產經紀、外匯經紀、倫敦金達人、劫匪…但偏偏好少期權經紀,債券經紀、ETF經紀,dO yOU uNderStand WHAt7Isay?
  12. 當然,人既最大槓桿係改善自己的行為與想法、追尋雙方共同利益、多在他人情況設想、好運自然來,人工自然高。

 

本案回答十點,個人背書認定確為投資要必勝之基本,你想贏先要明白人地困死左你係佢個局入面玩。如你攪唔清楚,係天仙局入面點玩都唔會贏。對上述要點能貫徹了解及執行,個人財富上升無限量。

 

*係now 財經台解答新昌直債之節錄

 










本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室