【買樓成為千萬富翁的主要途徑】 (2016/03/26)

 

 

從前80至90年代,只要閣下擁有100萬元,即可被定義為「富翁」,有100萬嘅男人,老婆讚你好老公,亞媽話你好仔,朋友親戚會視為榜樣。隨著通貨膨漲物價上升,即使今時今日銀行有100萬,講真,你都唔敢攞去亂揈,亦都冇乜嘢值得「曬命」,因為要喺市區買層400呎嘅樓(講梗實用300多呎嗰啲),盤源仍少,價錢亦貴,選擇有限,攞100萬出嚟,都係做到三成首期供20年,還未計其他雜項使費例如律師樓造契費及添置傢俬和裝修單位的費用,100萬祇勉強夠首期買到「上車版」嘅物業。

有1,000萬就唔同,買物業嘅選擇闊咗,仲夠你買埋車位(註一),當然,1,000萬喺香港亦唔算得乜嘢錢,跟身家過億,有物業收租和業務上軌道的真正富翁仍有一段頗大距離,之不過閣下若理財有道,用起上來亦真係幾好用,又俾到另一半有安全感,所以1,000萬身家喺普遍平民心目中,都算係「富翁」嘅新標準。

香港是資本主義現實社會,愛情飲水飽只獲少數人認同,幸福的婚姻生活建基於經濟能力,能力愈大,問題愈少(唔講陳腔濫調有錢買唔到健康/性命/親情),因為大部份人都相信貧賤夫妻係百事哀,現今男女嘅擇偶條件和邏輯,都包括了經濟能力,老婆希望老公俾到買樓首期(其他師奶有樓揸手咁冇理由佢冇啫),老公又希望老婆可以分擔部份供樓壓力,總之,錢唔使多,唔缺用就幸福。

花旗公佈的「有趣數字」,講真,個人唔覺得有趣,那些相信都屬「大數據」數字,無可否認數據比傳統做問卷得來的數字來得準確。當然,數據本身亦有「有趣」的地方,看你如何自行演繹(或為了自娛而演繹),譬如,若某港女希望有一個身家1,000萬的老公/男友,她應該認識多點60歲仍單身的男人;又例如千萬富翁月入為11萬元,18%為公司老闆,換句話說,「打工仔」仍佔多數,若撇除銷售行業,純「打工」的,可分為「公務員」或「私營機構僱員」,就以警隊為例,你男友/老公一日未做到薪級點第53級的「高級警司」,月入都冇11萬;若係私營機構打工的,我知,飛機師有!

13%的千萬男富翁仍屬單身,你可演繹有一成富翁無敵是最寂寞,但香港沒規定要結婚先可生仔,如女方同意唔註冊結婚,形式上都男人都係有「家室」。 五份1千萬富婆單身,又是否意味男人怕老婆叻過自己,或女人已經睇唔上平凡男人,定還是為搵錢已冇時間戀愛!?

值得一提,只有17%的千萬富翁係靠股票賺錢,即是其他83%都係非股票投資(eg.做生意或買樓致富…),寄望炒股發達,5個富翁都冇1個。上述「83%」這則數字,幾乎吻合「85%」千萬富翁已有物業,由此可見,老曹(曹仁超)告誡年輕人「別讓500呎縛住青春」,並不適用「我夢想就係做千萬富翁」的香港年輕人。

最後,逾60% 千萬富翁預計樓價將來兩年下跌,相信餘下的應該相信樓價平穩發展居多(大升難矣),要「自我完成」的預言成真,意識形態要有足夠的人去付諸實踐完成和「支持」,故此將來樓價照計會跌但唔會好大跌,推算恒地李兆基(四叔)早前公開認為的「最多跌三成」之說照計唔係啱晒!因為若揣摩四叔的言下之意,應該咁演繹:「看跌兩成(幾),最多三成咁啦!」

綜合在香港成為富翁的主要途徑:「有樓揸手,兩間就夠,唔使學乜嘢逢三退一」、「穩定高收入,月入接近10萬最好」、「股票唔使揸多」...

最後,近九成富翁及八成富婆屬已婚&有拖拍人仕,想提高做到富翁的機率,
請閣下謹記「戀愛」R!

 

 

註一:唔計市區新入伙盤嗰啲300萬一個嘅車位。又,買舖位就唔夠錢喇,買劏舖就絕對唔建議,買工廈就要親身研究物業位置/地契/貨檯/泊櫃/承重,這是後話日後再討論。

 








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室